Qazaqstanda ınvataksı qyzmetin kórsetý erejeleri ózgertiledi
ASTANA. KAZINFORM — Kólik mınıstrligi jolaýshylardy avtomobılmen tasymaldaý salasyndaǵy qoldanystaǵy normatıvtik quqyqtyq aktilerge ózgerister engizýdi kózdeıtin buıryq jobasyn ázirledi.
Bul qujat múmkindigi shekteýli jandarǵa kóliktiń qoljetimdi bolýyn, tasymaldaý jumysyn jaqsartýdy jáne talaptardy búgingi zamanǵa saı jańartýdy kózdeıdi.
— Invataksı qyzmetine qatysty ózgeris bar: endi ony kimder ala alatyny naqtylanady. Ol úshin arnaıy tizim (qosymsha) jasalady, onda ınvataksıge quqyq beretin medıtsınalyq kórsetkishter naqty jazylady. Bul atalǵan qyzmetti alýshylardy aıqyndaýda biryńǵaı tásildi qamtamasyz etýge múmkindik beredi, — delingen habarlamada.
Jergilikti atqarýshy organdardyń ınvataksımen sapar uzaqtyǵyn aıqyndaý jónindegi ókilettikteri keńeıtiledi. Bul tásil halyqtyń qajettilikterin eskere otyryp, retteýdi neǵurlym ıkemdi júrgizýge múmkindik beredi.
Sondaı-aq 18 jasqa tolǵan múgedektigi bar adamdardy jeke kómekshilerdiń alyp júrý múmkindigi bekitiledi.
Sonymen qatar avtomobıl kóligimen jolaýshylardy tasymaldaý qaǵıdalaryna ózgerister engiziledi. Qoǵamdyq kóliktiń júktemesi joǵary bolǵan jaǵdaıda balalar arbalaryn alyp júrý sharttary naqtylanyp, avtobýstardaǵy baǵyttyq kórsetkishterdi rásimdeýge qoıylatyn talaptar ózektendiriledi.
Konkýrstyq rásimderdi jetildirý aıasynda tasymaldaýshylardy baǵalaýdyń qosymsha ólshemsharttaryn engizý kózdelgen. Atap aıtqanda, elektrli jáne gıbrıdti qozǵaltqyshtary bar avtobýstardy qosa alǵanda, ekologııalyq kólikti paıdalaný yntalandyrylady. Bul jyljymaly quramdy jańartýǵa jáne qorshaǵan ortaǵa túsetin áserdi azaıtýǵa baǵyttalǵan.
Budan bólek, óńirlerdegi avtovokzaldardyń ataýlary men ornalasqan jeri naqtylana otyryp, tekserý júrgiziletin kólik ınfraqurylymy nysandarynyń tizimi naqtylanyp jatyr.
Buıryq jobasy 2026 jylǵy 8 sáýirde «Ashyq NQA» ınternet-portalynda ornalastyryldy.
Osyǵan deıin bıyl múgedektigi bar adamdar ınvataksı qyzmetine 112 myńnan astam tapsyrys bergenin jazdyq.
