Qazaqstanda ınva-kýpelerdiń sany artyp keledi

ASTANA. KAZINFORM - Elimizde múmkindigi shekteýli jandarǵa arnalǵan arnaıy vagondardyń qatary ulǵaıtylyp jatyr.

«Erekshe qajettiligi bar adamdardyń jaıly jol júrýi úshin bıyl taǵy 14 vagon satyp alý josparlanǵan. Onyń jeteýi búgingi tańda paıdalanýǵa berilgen. Jolaýshylar vagondary jańartylǵan saıyn ınva-kýpe sany da artyp keledi. Osy rette erekshe qajettiligi bar adamdar úshin temirjol vagondaryn jańartý boıynsha júıeli jumys jalǵasyp jatqanyn aıta ketken oryndy. Máselen, jańa vagondar „Qyzylorda — Semeı“, „Pavlodar — Túrkistan“, „Aqtaý — Aqtóbe“ baǵyttarynda belsendi qoldanylyp keledi», — dep jazdy Kólik mınıstrliginen.

Aıta keterligi, ótken jyly arnaıy oryndary bar 11 ınva-kýpe satyp alyndy. Jalpy elimiz boıynsha múmkindigi shekteýli jolaýshylarǵa arnalǵan arnaıy vagondary bar 110 quram qatynaıdy. Jeke tasymaldaýshylar tarapynan taǵy úsh jańa baǵyt boıynsha arnaıy vagondar berilmek.

Jańa vagondar — sapa jáne qaýipsizdik standarttaryna sáıkes keletin otandyq ónim. ıAǵnı, vagondardaǵy kýpe alańy ulǵaıtylyp, arnaıy kótergish mehanızmder ornatylǵan, jolserikterdi shaqyrý túımelerimen qaıta jabdyqtalǵan.

Esterińizge sala keteıik, kólik salasyna jaýapty mınıstrlik jergilikti atqarýshy organdarmen birlesip ınvataksı sanyn arttyrý boıynsha da jumysty jalǵastyryp jatyr. Óńirlerde jalpy avtoparki 760-qa jýyq mamandandyrylǵan mashınadan quralǵan 119 ınvataksı qyzmeti jumys isteıdi.