Qazaqstanda ınternet paıdalanýshylar sany 12 mıllıonǵa jetti
ASTANA. QazAqparat - Qazaqstanda ınternet paıdalanýshylar sany 12 mıllıonǵa jetti. Bul týraly búgin Birikken Ulttar Uıymynyń Global e-Government Forum-2014 forýmy barysynda QR Investıtsııalar jáne damý mınıstri Áset Isekeshev málim etti.
«Úkimet halqymyzdyń kompıýterlik saýattylyǵyn arttyrý úshin belsendi jumystar júrgizýde. Qazirgi ýaqytta halyq arasyndaǵy kompıýterlik saýattylyq deńgeıi shamamen 63 paıyzǵa jetip otyr. Internet paıdalanýshylar sany 12 mıllıonǵa jetti, bul halyqtyń 70 paıyzyn quraıdy», - dedi Á.Isekeshev.
Mınıstrdiń atap ótýinshe, sandyq televıdenıemen halyqty qamtý kórsetkishi 51 paıyzǵa jetip otyr. Al jyl sońyna deıin bul kórsetkishti 72 paıyzǵa jetkizý josparda bar.
«2 jyldyń ishinde biz halyqty sandyq televıdenıemen qamtý kórsetkishin 95 paıyzǵa jetkizemiz», - dedi ol.
