Qazaqstanda ınternet qyzmeti óte qymbat - V.Nehoroshev
ASTANA. Qarashanyń 10-y. QazAqparat /Aıdar Ospanalıev/ - Búgin Parlament Májilisinde «Elektrondyq úkimetti» damytý máselesine arnalǵan zań jobasynyń tanystyrylý rásiminde depýtat Vladımır Nehoroshev Aqparattandyrý jáne baılanys salasynyń qyzmetin synǵa aldy,
dep habarlaıdy QazAqparat.
Depýtattyń aıtýynsha, Qazaqstanda ınternet qyzmeti óte qymbat. Kompıýterdiń jaǵdaıy Májilistiń ózinde de máz emes. Birde istese, birde istemeıdi. Aýyldyq jerde onyń qandaı jaǵdaıda ekendigi aıtpasa da túsinikti. Al turǵyndardyń kompıýterdi meńgerý deńgeıi tym tómen. «Aqparattandyrý jáne baılanys agenttigin osyǵan deıin elimizdiń azamattarynyń barlyǵy kompıýterdi meńgergen, eldegi barlyq mektepterde ınternet bar degen syńaıda aqparat taratqan bolatyn. Alaıda biz qazir elimizdiń mektepterinde túgeldeı derlik ınternet bar dep aıta almaımyz», dedi halyq qalaýlysy.
Onyń pikirinshe, bizge qazir birinshi kezekte respýblıka turǵyndarynyń kompıýterlik saýattylyǵyn arttyrý máselesine kóńil bólgen abzal. Bul máseleni baısaldy túrde satylap júzege asyrý kerek. Sondaı-aq elektrondyq saýda qyzmetine qatysatyn azamattardyń barlyǵy kompıýterdi jaqsy meńgerýleri tıis. «Bizdiń ınternet resýrstarymyz qazirgideı emes, tolyqtaı jumys isteıtin bolǵan kezde ǵana oılaǵan maqsat oryndaldy dep aıta alamyz», dedi V. Nehoroshev.
