Qazaqstanda ınternet-dúken ashý úshin ne isteý kerek
«Qazposhta» AQ-nyń elektrondy saýda jónindegi atqarýshy dırektory Asqarbek Alshanbaevtyń aıtýynsha, búginde ınternet-dúken ashý úshin naqty úsh máseleni eskerý kerek.
«Birinshiden, platforma qajet. Sol platformanyń negizinde kez kelgen adam óziniń ınternet-dúkenin asha alady. Ekinshiden, logıstıka, ıaǵnı satylǵan taýarlardy jetkizý jelisi bolýy shart. Búginde respýblıka boıynsha 70-ten astam kýrerlik kompanııa bar. Sonyń ishinde kez kelgen kompanııany jaldap, kelisimshartqa otyrýǵa bolady. Sonda kýrerler ınternet dúkenniń taýarlaryn tutynýshyǵa jetkizip otyrady. Úshinshiden, tólem júıesin engizý kerek. Ol kartochka bola ma, poshta bólimshesinde tólene me, naqty bir tólem quralyn tańdap, ınternet-dúkenge engizý qajet. Osy úsh negizgi mindet bar. Sosyn tórtinshisi, ol - marketıng. Máselen, áleýmettik jelilerde arnaıy paraqshalardy ashyp, onlaın marketıng júrgizýge bolady», - dedi A.Alshanbaev.
Onyń aıtýynsha, bıyldan bastap Salyq kodeksiniń elektrondy saýdaǵa qatysty ózgeristeri kúshine endi. Oǵan sáıkes, barlyq ınternet dúkender korporatıvti jáne tabys salyǵynan 5 jylǵa deıin bosatylady. Atalǵan jeńildikti alý úshin naqty úsh shart bar. Birinshiden, saýda-sattyq onlaın rejımde júrgizilýi tıis. Ekinshiden, taýardyń aqshasy elektrondy júıe arqyly tólenýi shart. Úshinshiden, taýar kýrerlik kompanııa arqyly tikeleı tutynýshyǵa jetkizilýi kerek.
Aıta keteıik, búgingi semınarǵa «1S-Bıtrıks Qazaqstan» kompanııasynyń dırektory Sarmantaı Qasenov, «InSales»-tiń Qazaqstandaǵy dırektory Nıkıta Krasnoıarov, «iLab» kompanııasynyń jetekshisi Vladımır Denısov, «aRex Group» ınvestıtsııalyq kompanııasynyń marketıng jáne satý jónindegi dırektory Anna Osıpova shaqyryldy. Dáristerdi tyńdaýǵa kelgen adamdardyń kóp bolǵany sonsha, barlyǵy «E-Commerce» ortalyǵyna syımaı ketti.