Qazaqstanda ınternet-bankıngti belsendi paıdalanýshylar sany 23 mln-ǵa jetip qaldy

ASTANA. QazAqparat – Qazaqstandyqtar arasynda ınternet-bankıngtiń tanymaldyǵy artyp keledi. Jyldan jylǵa paıdalanýshylar sany qarqyndy artýda, dep habarlaıdy QazAqparat tilshisi.

Finprom.kz portalynyń dereginshe, 2022 jyldyń sońynda onlaın jáne mobıldi bankıngti belsendi paıdalanýshylardyń sany 22,9 mln-ǵa jetti. Bul 2021 jylǵy kórsetishpen salystyrǵanda 20 paıyzǵa kóp.

Búginde elimizdiń árbir derlik bankinde mobıldi qosymsha bar. Bul rette ekinshi deńgeıli eń iri bankterde atalǵan ónim túri barynsha jaqsy damyǵan. Máselen, tanymal Google Play mobıldi qosymshasynyń «Qarjy» sektoryna qatysty reıtınginde osy jyldyń qańtar-mamyr aralyǵynda Kaspi.kz qosymshasy, Jusan Bank-tiń Jusan jáne Halyk Bank-tiń Halyk Homebank qosymshasy kósh bastaǵan.

Bul bankterdiń kóshbasshy bolýy da zańdylyq. Sońǵy jyldary olar ózderiniń qosymshalaryn damytý úshin kóptegen is-shara qabyldap, servısterin únemi jańartyp otyrdy. Jańartý júıeli túrde júrgizildi. Aıtalyq, taıaýda ǵana Jusan Bank mobıldi qosymshasyn jańartqan bolatyn. Nátıjesinde qosymsha dızaıny tolyqtaı jańaryp, qyzmeti jaqsardy jáne paıdalanýshylarǵa qolaıly bola tústi.

Aıta keterligi, 2022 jyly qolma-qol aqshasyz operatsııalardyń jalpy qurylymyndaǵy onlaın-operatsııalar úlesi sany boıynsha 64,6 paıyzdy, al kólemi boıynsha 82,5 paıyzdy qurady. Qazaqstandyqtar kún saıyn tsıfrlyq bankıng kómegimen somasy 234,7 mlrd teńgeden asyp túsetin ortasha eseppen 15,2 mln operatsııa jasaıdy.