Qazaqstanda Internet arqyly aıyna 100 myńǵa tarta kıbershabýyldar jasalady
ASTANA. QazAqparat - Qazaqstanda ınternet arqyly aıyna 100 myńǵa tarta kıbershabýyldar jasalady. Bul týraly búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynan keıin jýrnalısterge bergen suhbatynda Ulttyq qaýipsizdik komıtetiniń Basqarma basshysy Ǵalymbek Tátenov málim etti.
Eske salaıyq, komıtette «Ujymdyq qaýipsizdik týraly shart uıymyna múshe-memleketterdiń aqparattyq saladaǵy qylmystyq áreketterge qarsy ózara árekettesý týraly hattamany ratıfıkatsııalaý týraly» zań jobasy talqylanǵan bolatyn. Atalǵan hattamaǵa UQShU memleketter basshylary 2014 jyldyń jeltoqsan aıynda Máskeýde qol qoıǵan.
Basqarma basshysynyń aıtýynsha, hattama aqparattandyrý salasyndaǵy , sonyń ishinde Internettegi qylmysqa tán qubylystardy anyqtap, oǵan qarsy kúresýge baǵyttalady. Ondaı qubylystardyń qatarynda UQShU múshe-memleketteriniń qaýipsizdigine qater tóndiretin qylmystar da bar. Hattama aıasynda UQShU músheleri osy saladaǵy qylmystardy birlese anyqtap, ol boıynsha qylmystyq is qozǵaýǵa, tergeýler júrgizip, jaýapkershilikke tartýǵa qatysty sharalar qamtylady.
«Qazaqstanda barlyq arnaıy júıeler Internet jelisi segmentterinde kıbershabýyldardy anyqtap, olarǵa tehnıkalyq qarsy turý men joıý jumystary udaıy júrgizilip keledi. Negizinen ondaı shabýyldar vırýstyq sıpatta enip, maqsattary da ártúrli bolyp otyrady. Máselen, kıberalaıaqtar jeke tulǵa týraly aqparattar ıelenýge, olardyń jeke shottaryna kirip, qarajattaryn urlaýǵa qatysty qylmystarǵa barady. Kıbershabýyldar negizinen shet elderdegi Internet jelisi segmentterinen shyǵyp, bizdiń arnaıy qyzmet olardyń aldyn alyp otyrady», - dedi Ǵ. Tátenov.
«Biz aıyna 100 myńǵa tarta kıbershabýyldardy tirkeımiz. Bulardyń basym bóligi vırýstyq silemeler arqyly keledi, sosyn tehnıkalyq deńgeıde birden anyqtalady. Degenmen, nysanaly shabýyldar da barshylyq», - dedi ol.
