Qazaqstanda ınternet-alaıaqtyqtan kelgen shyǵyn 4,8 mlrd teńgege jetti
ASTANA. KAZINFORM – Internet-alaıaqtyqty ashý – óte kúrdeli protsess. Sebebi qylmyskerler shekara talǵamaıdy jáne álemniń kez kelgen jerinde áreket etýi múmkin. Bul týraly Kıberqylmyspen kúres departamenti basshysynyń orynbasary Álibek Orazaly aıtty.
Onyń aıtýynsha, ótken jyly 6 myńnan astam ınternet-alaıaqtyq deregi ashylyp, 1 700 adam qylmystyq jaýapkershilikke tartyldy. Al bıylǵy jyldyń alǵashqy úsh aıynda 447 adam jaýapqa tartyldy.
– Alaıaqtyqpen kúres barysynda tek ishki ister organdary ǵana emes, ózge de ýákiletti qurylymdar, IT salasynyń mamandary men buqaralyq aqparat quraldarynyń ókilderi birlesip jumys istep jatyr. Qazirdiń ózinde naqty nátıjeler bar, - dedi Álibek Orazaly.
Óz kezeginde QR Bas prokýratýrasy Quqyqtyq statıstıka jáne arnaıy esepke alý komıteti tóraǵasynyń orynbasary da qylmystyq isterdiń tirkelýi men zalal kólemine qatysty málimet berdi.
– Bizdiń komıtet quqyqtyq statıstıkany júrgizýge ýákiletti organ bolyp tabylady. Barlyq qylmystyq ister Biryńǵaı sotqa deıingi tergep-tekserý reestrinde tirkeledi. Osy arqyly eldegi krımınogendik jaǵdaıdy, onyń ishinde alaıaqtyq deńgeıin kórip otyrmyz. Bıylǵy jyldyń birinshi toqsanynda keltirilgen shyǵyn kólemi 4,8 mlrd teńgeni qurady. Onyń 2,4 mlrd teńgesi jábirlenýshilerge qaıtaryldy, - dedi komıtet ókili.
Sonymen qatar ınternet-alaıaqtyq boıynsha jyldyq kórsetkishter de aıtyldy.
– Jalpy, 2025 jyly ınternet-alaıaqtyqtan kelgen shyǵyn 12,2 mlrd teńgeni qurady. Bıyl 5 mlrd teńge kóleminde qarajat qaıtaryldy. Ótken jylmen salystyrǵanda zalaldy óteý baǵytynda oń dınamıka baıqalyp otyr, - dedi Bas prokýratýra ókili.
Buǵan deıin 2025 jyly ınternet alaıaqtyq faktisi 22%-ǵa artqanyn jazǵanbyz.
