Qazaqstanda ınternet-alaıaqtyqtan keletin shyǵyn 20 mlrd teńgege jetti
ASTANA. KAZINFORM – Elimizde ınternet-alaıaqtyqtan kelgen jalpy shyǵyn kólemi 20 mlrd teńgeni qurap otyr. Bul týraly QR ІІM Kıberqylmysqa qarsy is-qımyl departamentiniń bastyǵy Jandos Súıinbaı OKQ alańynda ótken brıfıngide málimdedi.
Onyń aıtýynsha, bıyl ınternet-alaıaqtyqtyń aldyn alý baǵytyndaǵy jumystar kúsheıtilgen. Osy ýaqyt ishinde aqparattyq keńistikte 38 myńǵa jýyq materıal jarııalanyp, memlekettik organdarda, bilim berý jáne densaýlyq saqtaý uıymdarynda, bankter men jekemenshik sektorda 34 myńǵa jýyq profılaktıkalyq is-shara ótkizilgen.
– Qabyldanǵan sharalardyń nátıjesinde bıylǵy tórt aıdyń qorytyndysy boıynsha ınternet-alaıaqtyqty tirkeý 2,5%-ǵa tómendedi. Sonymen qatar qylmysty ashý kórsetkishi 32,2%-dan 40,6%-ǵa deıin ósti. Al ashylmaǵan qylmystyq ister sany 16,6%-ǵa qysqardy, - dedi Jandos Súıinbaı.
Spıkerdiń málimetinshe, ınternet-alaıaqtyqtan kelgen jalpy shyǵyn kólemi 20 mlrd teńgeni quraǵan. Onyń shamamen 4 mlrd teńgesi azamattarǵa qaıtarylǵan.
Sondaı-aq ІІM-niń resmı saıtynda kıberqylmyspen kúreske arnalǵan arnaıy bólim jumys isteıdi.
Aıta keteıik, buǵan deıin elordada 4 myńnan astam saıt buǵattalǵany habarlanǵan edi.
