Qazaqstanda ınnovatsııalyq jobalar jańa baǵdarlama boıynsha qarjylandyrylmaq

ASTANA. QazAqparat - «Tehnologııalyq damý jónindegi ulttyq agenttigi» AQ elimizdiń Investıtsııalar jáne damý mınıstrligimen birlesip ınnovatsııalyq jobalardy granttyq qarjylandyrýdyń jańa baǵdarlamasyn júzege asyrýdy bastady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda «TDUA» AQ-nyń basqarma tóraǵasy Marat Omarov málim etti, dep habarlaıdy QazAqparat.

«Innovatsııalyq granttardy alýǵa ótinimder 2017 jyldyń 2 tamyzynan bastap 2 qazan aralyǵynda qaǵaz túrinde qabyldanady. Sonymen birge digital.baiterek.gov.kz ınternet portaly arqyly elektrondy túrde de berýge bolady. Biz bıznes protsesterdi qaıta ınjenerleýden ótkizdik jáne granttardy berý sharttaryn jaqsarttyq», - dedi ol.

Onyń aıtýynsha, ulttyq agenttik buǵan deıin bıznes úshin tartymsyz bolyp tabylatyn jáne sońǵy ónimdi shyǵarýdy qarastyrmaıtyn granttyń 9 túrin qarastyryp kelgen. Al jańa baǵdarlamada olardy qarjylandyrýdy shekteý aıtarlyqtaı ulǵaıyp 3 túrge toptastyrylǵan.

«Jumys istep turǵan kásiporyndardyń tehnologııalyq damýyna ınnovatsııalyq granttardy berýdiń jańa erejelerine sáıkes granttyń somasy lıtsenzııalyq shart boıynsha dáleldengen shyǵyndardyń 70, jabdyqtardy satyp alý úshin dáleldengen shyǵyndardyń 50 paıyzyna deıin quraıdy. Al aqshalaı túrde 400 mln. teńgege deıin. Grant ozyq ári qazirgi zamanǵy otandyq jáne sheteldik tehnologııalardy transfertteý arqyly kásiporyndardyń tehnologııalyq deńgeıin arttyrýǵa baǵyttalǵan», - dedi Marat Omarov.

Agenttik basshysynyń sózine qaraǵanda, salalardyń tehnologııalyq damýyna bólinetin granttyń kólemi lıtsenzııalyq shart boıynsha dáleldengen shyǵyndardyń 70, jabdyqtardy satyp alý úshin dáleldengen shyǵyndardyń 50 jáne tehnologııalyq quziretti arttyrý boıynsha dáleldengen shyǵyndarǵa ketken shyǵystardyń 85 paıyzyna deıin quraıdy. Bul rette beriletin granttyń aqshalaı somasy 500 mln. teńgege deıin bolady. Grant negizinen tájirıbege, bilimge, daǵdylanýǵa, ozyq jáne qazirgi zamanǵy otandyq jáne sheteldik tehnologııalardy transfertteý arqyly jumys istep turǵan salalardyń damýyna baǵyttalǵan.

«Tehnologııalardy kommertsııalaý grantynyń kólemi dáleldengen shyǵyndardyń 50 protsentine, aqshalaı túrde 200 mln. teńgege deıin», -dedi Omarov.