Qazaqstanda ınnovatsııalyq kompanııalar reıtıngi qurylady
ASTANA. QazAqparat - Tehnologııalyq damý jónindegi ulttyq agenttik «MOST» Bıznes-ınkýbatorymen birlesip, Qazaqstan Respýblıkasynyń Investıtsııalar jáne damý mınıstrliginiń qoldaýymen bıyl 17-maýsymnan 17-qyrkúıekke deıin «Qazaqstannyń ınnovatsııalyq kompanııalarynyń reıtıngi 2018» úshin ótinimder qabyldaýdy bastaıdy, dep habarlaıdy QazAqparat atalmysh vedomostvonyń resmı saıtyna silteme jasap..
Bul týraly búgin QR IDM Medıa-ortalyǵynda ótken brıfıngte Tehnologııalyq jáne ınnovatsııalyq damý departamenti dırektorynyń orynbasary Nesipgúl Esenbaeva men «Tehnologııalyq damý jónindegi ulttyq agenttik» AQ Basqarma tóraǵasynyń orynbasary Dáýren Sábdenov málim etti.
Reıtıng kompanııalardyń arasynda ınnovatsııalyq qyzmetti yntalandyrýǵa, tsıfrlandyrýǵa kóshý qyzyǵýshylyǵyn arttyrýǵa, túrli salalarda jumys isteıtin joǵary ınnovatsııalyq belsendiligi bar qarqyndy damyp kele jatqan qazaqstandyq kompanııalardy anyqtaýǵa baǵyttalǵan.
Reıtıngke kez kelgen qazaqstandyq kompanııa qatysa alady. Innovatsııalyq belsendilik jobalardyń ınnovatsııalyq-tehnologııalyq deńgeıi, kásiporynnyń jalpy shyǵyndarynan jańa tehnologııalarǵa qarjylyq shyǵyndarynyń mólsheri, jańa ónimderdi óndirýdiń nemese jańa tehnologııalardy engizýdiń ekonomıkalyq áseri, kompanııa qyzmetkerleriniń jalpy sanynan ınnovatsııamen aınalysatyn qyzmetkerler sany jáne kásiporynda ınnovatsııalyq qyzmetke jyl saıyn jumsalǵan adam-saǵat sany boıynsha baǵalanady.
Reıtıngtiń kóshbasshylary táýelsiz sarapshylardyń jáne «TDJUA» AQ tehnologııalyq baǵalaýy negizinde tańdalady. Táýelsiz saraptamalyq komıssııa quramyna ınnovatsııalar salasyndaǵy qoǵam qaıratkerleri men mamandar kiredi.
«MOST» bıznes-ınkýbatorynyń operatıvti dırektory Alına Isahanovanyń aıtýynsha, byltyrǵy jylǵa qaraǵanda aıyrmashylyqtar bar. Atap aıtqanda, reıtıngtiń ádistemesi «TDJUA» AQ qosymsha ólshemderdi jáne tehnologııalyq baǵalaýdy engizý arqyly jetildirildi jáne túzetildi. Bul ótinim berýshi kompanııalar jobalarynyń ınnovatsııalylyǵy men tehnologııalylyǵyn neǵurlym dál anyqtaýǵa múmkindik beredi.
Reıtıngtiń kóshbasshylary týraly buqaralyq aqparat quraldarynda, áleýmettik jelilerde jáne Internet-portaldarda aqparat keńinen jarııalanady. Reıtıngtiń qorytyndylary «TDJUA» AQ men TheSteppe veb-saıttaryna shyǵady.
Qazaqstannyń ınnovatsııalyq kompanııalarynyń reıtıngi 2018 jobasyna qatysý úshin reıtıngtiń https://natd.gov.kz/activity/rating/ resmı ınternet-paraqshasy arqyly ótinish berýge bolady.
Qazaqstannyń ınnovatsııalyq kompanııalarynyń reıtıngi alǵash ret 2017 jyly ótkizildi. Nátıjelerin TheSteppe veb-saıtynan kelesi silteme arqyly kórýge bolady: https://the-steppe.com/most-rating.
