Qazaqstanda ınklıýzııa boıynsha alǵashqy búkilálemdik kongress ótedi

ASTANA. KAZINFORM — Bul jańalyq Londonda ótken bilim salasyndaǵy eń aýqymdy shara — Bett Show alańynda jarııalandy, dep habarlaıdy Oqý-aǵartý mınıstrliginiń baspasóz qyzmeti.

Búkilálemdik kongress ınklıýzııa salasy boıynsha úkimettiń, pedagogterdiń, tehnologııalyq kompanııalardyń, sarapshylar men mamandardyń basyn qosatyn biregeı jahandyq platforma bolmaq. Onyń basty maqsaty — zamanaýı jetistikterdi talqylaý, úzdik tájirıbelermen bólisý jáne ınklıýzııalyq bilim berýdi damytý.

Kongresstiń kelesi negizgi erekshelikterin atap ótýge bolady:

• Praktıkalyq iske asyrýǵa basymdyq berý;
• Úshjaqty tásil (pedagogıkalyq ınnovatsııalar, tehnologııalyq jetistikter, korporatıvtik yntymaqtastyq);
• Jasandy ıntellekt pen zamanaýı tehnologııalardy qoldanýǵa erekshe nazar aýdarý.

— Kongress ınklıýzıvti bilim berý salasyndaǵy alǵashqy halyqaralyq bastama bolady. Bul bedeldi halyqaralyq sharany Qazaqstanda ótkizý — bizdiń ádiletti jáne ınklıýzıvti qoǵam qurýǵa degen umtylysymyzdy kórsetedi, sondaı-aq bilim berý reformalary men tehnologııalyq ınnovatsııalardaǵy jetistikterin aıqyndaıdy. Oǵan halyqaralyq korporatıvtik kóshbasshylardyń qatysýy strategııalyq múmkindikterge jol ashyp, Qazaqstanǵa álemniń nazaryn aýdaryp qana qoımaı, ınvestıtsııalar tartýǵa yqpal etedi, — dep atap ótti QR Oqý-aǵartý mınıstrliginiń Inklıýzıvti jáne arnaıy bilim berý departamentiniń dırektory Laýra Býtabaeva.

Aıta keteıik, 2024 jyly elimizde erekshe bilim berý qajettilikteri bar balalar sany 230 myńnan asty. Eldegi mektepterdiń 90%-da ınklıýzıvti bilim berýge jaǵdaı jasalǵan, al arnaıy psıhologııalyq-pedagogıkalyq qoldaýmen qamtylǵan balalardyń úlesi 80%-dy quraıdy.

Buǵan deıin Qazaqstanda ınklıýzııa salasynda sarapshylar daıyndaıtyn ortalyq ashylǵanyn jazǵan edik.