Qazaqstanda ınklıýzıvti tsıfrlyq platforma ázirlendi
ASTANA. KAZINFORM — Ál-Farabı atyndaǵy Qazaq ulttyq ýnıversıtetinde ınklıýzıvti tsıfrlyq platforma ázirlendi. Joba múmkindigi shekteýli stýdentterdiń bilim alýyna jáne ýnıversıtet ómirine belsendi qatysýyna qolaıly jaǵdaı jasaýǵa baǵyttalǵan.
Ǵylym jáne joǵary bilim mınıstrligi baspasóz qyzmetiniń málimetinshe, ázirleme aqparattyq tehnologııalar jáne jasandy ıntellekt fakýlteti stýdentteriniń óndiristik tájirıbesi aıasynda júzege asyryldy. Bastamaǵa QazUÝ-dyń Aqparattyq tehnologııalar departamenti men Pan Gı Mýn atyndaǵy Turaqty damý ınstıtýty qoldaý kórsetti.
Pan Gı Mýn atyndaǵy Turaqty damý ınstıtýtynyń dırektory Dılıara Ýrmanovanyń aıtýynsha, bul — Qazaqstanda múmkindigi shekteýli stýdentterdiń tikeleı qatysýymen júzege asyrylǵan alǵashqy tolyqqandy joba.
— Jobanyń basty ereksheligi — naqty tsıfrlyq ónimdi ınklıýzıvti stýdentter komandasynyń birlesip ázirleýi. Jobaǵa estý jáne kórý qabileti buzylǵan, sondaı-aq sal aýrýyna shaldyqqan bilim alýshylar qatysty. Tıimdi kommýnıkatsııany qamtamasyz etý úshin kásibı sýrdoaýdarmashy tartyldy. Al tsıfrlyq qoljetimdilikke qatysty barlyq sheshimder múmkindigi shekteýli stýdentterdiń tájirıbesi eskerile otyryp ázirlenip, synaqtan ótkizildi, — dedi ol.
Joba aıasynda qatysýshylar baǵdarlamalyq ónimdi ázirleýdiń tolyq tsıklinen ótti. Olar talaptardy taldap, júıe arhıtektýrasyn jobalady. Sonymen qatar fýnktsıonaldyq modýlderdi ázirlep, ınterfeıstiń qoljetimdiligin tekserip, platformany iske qosty.
Nátıjesinde jańalyqtar men medıa bólimi, is-sharalardyń ınteraktıvti kúntizbesi, Turaqty damý maqsattaryna arnalǵan blog, medıagalereıa jáne ózge de tsıfrlyq servısterdi qamtıtyn zamanaýı veb-platforma jasaldy.
Stýdentter ázirlegen ınklıýzıvti tsıfrlyq platforma Áleýmettik qorǵaý salasyn damytý ulttyq ǵylymı ortalyǵynyń qyzyǵýshylyǵyn týdyrdy. Qazirgi tańda ortalyq jobany odan ári damytý múmkindikterin jáne ony áleýmettik qorǵaý salasyndaǵy ınklıýzıvti tsıfrlyq sheshimderdi ázirleýge, kásibı damýdy qoldaýǵa ári azamattardyń ártúrli sanattary úshin aqparattyń qoljetimdiligin arttyrýǵa negiz retinde paıdalaný múmkindigin qarastyrady.
Osyǵan deıin Almatyda endi ınklıýzıvti talapqa saı emes nysandar paıdalanýǵa berilmeıtinin jazdyq.
