Qazaqstanda ınklıýzıvti bilim berýdi damytý boıynsha júıeli sharalar kúsheıtilmek
ASTANA. KAZINFORM — QR Oqý-aǵartý mınıstrliginiń bastamasymen ınklıýzıvti bilim berý júıesiniń tıimdiligin arttyrý máseleleri boıynsha jumys tobynyń otyrysy ótti. Bul týraly Oqý-aǵartý mınıstrligi málim etti.
Vedomstvonyń málimetinshe, Qazaqstanda ınklıýzıvti bilim berý adamı áleýetti damytýǵa baǵyttalǵan memlekettik saıasattyń mańyzdy quramdas bóligi sanalady. Memleket basshysy Qasym-Jomart Toqaev atap ótkendeı, árbir balany onyń qajettilikterine qaramastan qoldaý ádiletti ári ornyqty qoǵam qalyptastyrýdyń negizgi sharty. Teń múmkindikter qoǵamyn qurý jáne sapaly bilimge teń qoljetimdilikti qamtamasyz etý salada júrgizilip jatqan reformalardyń basty basymdyqtarynyń biri bolyp qala bermek.
— Qabyldanyp jatqan sharalar aıasynda elimizde erekshe bilim berýdi qajet etetin balalardy qoldaý ınfraqurylymy kezeń-kezeńimen keńeıtilýde. Qazirgi ýaqytta Qazaqstanda 537 beıindi uıym jumys isteıdi. Olardyń qatarynda 48 balabaqsha, 99 mektep, 126 psıhologııalyq-medıtsınalyq-pedagogıkalyq konsýltatsııa, 238 psıhologııalyq-pedagogıkalyq túzetý kabıneti, 12 aýtızm ortalyǵy jáne 14 ońaltý ortalyǵy bar. Qoldaý kabınetteriniń sany 1 095-ke deıin artty, — delingen habarlamada.
2025 jyldyń qorytyndysy boıynsha elimizdegi mektepterdiń 95,2 paıyzy erekshe bilim berý qajettilikteri bar balalardy oqytýǵa jaǵdaı jasaǵan. Inklıýzıvti ortada 94 527 bala bilim alýda. Memlekettik tapsyrys aıasynda 7 775 múmkindigi shekteýli bala psıhologııalyq-pedagogıkalyq qoldaýmen qamtylǵan.
Jumys tobynyń otyrysy barysynda erekshe bilim berý qajettilikteri bar balalardy keshendi qoldaýǵa baǵyttalǵan múddeli taraptardyń usynymdary tanystyryldy. Bul usynymdar bilim berý, densaýlyq saqtaý jáne áleýmettik qorǵaý júıeleriniń ózara is-qımylyn biriktirip, balanyń damýynyń barlyq kezeńderinde qajetti qyzmetterge qoljetimdiligin qamtamasyz etýge baǵyttalǵan.
QR Oqý-aǵartý mınıstrligi ınklıýzıvti bilim berýdi damytý jónindegi júıeli jumysty ári qaraı jalǵastyrady.
Aıta keteıik, elde ınklıýzıvti bilim berýdi damytýdyń jańa kezeńi bastaldy.