Qazaqstanda ınflıatsııa qarqyny birtindep baıaýlaı bastady
ASTANA. KAZINFORM — 2026 jylǵy naýryzda Qazaqstandaǵy ınflıatsııa baıaýlap, aılyq ósim 0,6%-dy qurady. Baǵa ósiminiń qarqyny aqpanmen salystyrǵanda tómendep, azyq-túlik, azyq-túlikke jatpaıtyn taýarlar jáne aqyly qyzmetter segmentterinde de birdeı úrdis baıqaldy. Degenmen jekelegen taýarlar men qyzmet túrleri boıynsha baǵa aıtarlyqtaı qubylyp, jyldyq ınflıatsııa deńgeıi áli de joǵary — 11% shamasynda qalyp otyr. Bul týraly Ulttyq statıstıka bıýrosy málim etti.
Aqpanmen salystyrǵanda baǵanyń ósý qarqyny 0,5% tarmaqqa baıaýlady. Baǵa ósiminiń baıaýlaýy barlyq quramdas bólikterde de baıqaldy: azyq- túlik taýarlarynyń baǵasy 0,7%, aqyly qyzmetter — 0,6%, azyq-túlikke jatpaıtyn taýarlar 0,5% ósti.
Azyq-túlik arasynda bir aı ishinde baǵa qııarǵa — 22,6%, pııazǵa — 10,9%, qyzanaqqa — 2,6%, qyryqqabatqa — 1,9%, qaraqumyq jarmasyna — 1,2%, shokoladqa bókken kámpıtterge — 0,9% tómendedi. Bul oraıda baǵa tátti buryshqa — 10,7%, bananǵa — 5,4%, qyzylsha men sábizge — 4,2%-dan, maılylyǵy 2-3% aıranǵa — 2,3%, balǵa — 1,8%, qantty pechene men sıyr baýyryna — árqaısy 1,3%-dan ósken.
Azyq-túlikke jatpaıtyn taýarlar arasynda shańsorǵysh baǵasy 8,2%, útik — 7,7%, smartfon — 2,7%, avtomobılder — 2,3%, áıelder sómkesi — 2,1% tómendegen. Baǵanyń ósýi altyn saqına, as úı peshi — 5,5%, teledıdar — 4,1%, symsyz qulaqqaptar — 2,2, korvalol — 1,7%, qolǵa jaǵatyn krem — 1,4%, tsementke — 1,3% baıqaldy. Qyzmetter arasynda basseınge barý (abonement) baǵasy 3,3%, elektrık qyzmetteri — 2,1%, karıesti emdeý — 1,6%, qalaaralyq avtobýsta jol júrý — 1,1%, avtomektepte oqý kýrstary 0,8% ósken.
Jyldyq ınflıatsııa máni 2026 jyldyń naýryzynda 11% qurady jáne aqpanmen salystyrǵanda 0,7 paıyzdyq tarmaqqa baıaýlady. Azyq-túlik taýarlarynyń baǵasy 11,7%, azyq-túlik emes taýarlar — 11,3%, aqyly qyzmetter — 10% ósken. Jyldyq mánde qııar baǵasy 40,9%, qyzanaq 16,5%, baklajan 14,8%, kúrish 5% arzandaǵan. Kerisinshe bir jyl ishinde alma 13,5%, suly 12,9%, kespe 12%, qara shaı 6,7% qymbattaǵan.
2025 jyldyń naýryzymen salystyrǵanda sýsabynnyń baǵasy 13,9%, kir sabyn — 7,3%, jaıma dastarhan — 6,5%, tusqaǵaz — 3,3%, bólme ósimdikteri — 3,2% ósken. Qyzmetter arasynda sálemdemelerdi jetkizý boıynsha kýrer qyzmetiniń baǵasy 14,3%, merekelerdi uıymdastyrý boıynsha qyzmetter — 10,8%, teledıdardy jóndeý — 7%, balalardy damytý ortalyqtarynyń qyzmetteri — 6,9% qymbattaǵan.
— Inflıatsııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Baqylaýlar qyzmetter men taýarlardyń tarıfteri men baǵalary — barlyǵy 537 pozıtsııa boıynsha júrgiziledi. Inflıatsııa boıynsha dınamıkalyq ózgeristerdi 2018 jyldan bastap kórsetkishter qamtylǵan arnaıy ázirlengen ınteraktıvti dashbordta kórýge bolady, — delingen habarlamada.
2026 jylǵy qańtardan bastap tutyný baǵalarynyń ındeksin eseptegende azyq–túlik taýarlarynyń úlesi — 41,1%, azyq-túlik emes taýarlar — 28,4%, aqyly qyzmetter 30,5% qurady.
Buǵan deıin Qazaqstanda azyq-túlik ınflıatsııasy 12,7%-ǵa deıin tómendegenin jazdyq.
