Qazaqstanda ınflıatsııa jyl sońyna deıin 6-8 paıyz dálizinde boljanady
ASTANA. QazAqparat - Elimizdegi ınflıatsııa boıynsha parametrler jyl sońyna deıin 6-8 paıyz dálizinde boljanady. Bul týraly búgin Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zańyna ózgerister men tolyqtyrýlar engizý týraly» zań jobasy talqylaý barysynda málim boldy.
Ulttyq bank tóraǵasy Qaırat Kelimbetovtiń aıtýynsha, qyrkúıek aıynyń qorytyndysy boıynsha jyldyq sıpattaǵy ınflıatsııa 7,4 paıyzdy qurap otyr. «Osylaısha, ınflıatsııanyń aǵymdaǵy deńgeıi boljamdy parametrlerden asyp otyrǵan joq. Sonymen qosa, ınflıatsııaǵa monetarlyq faktordyń áser etý deńgeıi tómen. Máselen, qańtar men qyrkúıek arasyndaǵy aqsha massasy on alty paıyzǵa ósti. Soǵan oraı, ınflıatsııanyń jyldyq boljamy belgilengen dálizde saqtalady», - dedi UB tóraǵasy.
