Qazaqstanda ınflıatsııa 3,8 % qurady - Ulttyq bank

ALMATY. QazAqparat - Qazaqstanda bıylǵy jeti aıda ınflıatsııa 3,8 % boldy. Bul ótken jylǵy kórsetkishten (5,2%) tómen bolyp otyr. Mundaı aqparatty QR Ulttyq banki taratty, dep habarlaıdy QazAqparat tilshisi.

Baspasóz qyzmetiniń habarlaýynsha, jyldyq ınflıatsııa shildede 7,1%-ǵa deıin tómendedi, bul azyq-túlik naryǵyndaǵy ahýaldyń turaqtanýyna sebepshi boldy. Jyldyq ınflıatsııa 2017 jylǵa belgilengen 6-8% dálizi sheginde tur.

Jyl ishinde bazalyq ınflıatsııanyń kórsetkishi 6,7%-ǵa deıin birtindep tómendegen, ol ınflıatsııalyq qordyń jaqsarýyna óz septigin tıgizgen.

Aı saıyn halyq arasynda ınflıatsııa nátıjeleri boıynsha saýalnama júrgiziledi. Shildede halyqtyń ınflıatsııany qabyldaý jónindegi pikiri boıynsha ınflıatsııa turaqty bolmaq.

Ótken aıdaǵy baǵanyń ósýin saýalnamaǵa qatysýshylardyń kópshiligi (43%) qalypty retinde qabyldady. Al ony kúshti dep baǵalaǵan respondentterdiń sany odan 10 tarmaqqa az. Bir jyl boıy halyqtyń baǵanyń ósýin baǵalaýy bir qalypty bolyp tur.

Alaıda, kelesi aıda baǵanyń qalypty ósýin kútetin halyqtyń úlesi ulǵaıdy.

Keler jyly baǵanyń ósýin kútetinder arasynda ósý qarqynynyń aǵymdaǵy deńgeıde saqtalatyndyǵy týraly pikir basym (36,3%-38,9%).

2017 jylǵy shildede «Sizdiń pikirińizshe, jalpy alǵanda baǵalar kelesi 12 aıda qalaı ózgeredi?» degen suraqqa berilgen jaýaptar boıynsha ınflıatsııanyń aldaǵy bir jylǵa eseptelgen sandyq baǵasy halyqtyń ınflıatsııalyq kútýleriniń 2018 jylǵa arnalǵan nysanaly dáliz sheginde (5-7%) 6,4% bolatynyn kórsetti.