Qazaqstanda ınfektsııalardyń ımmýnoprofılaktıkasy boıynsha mańyzdy progreske qol jetkizildi – DDSU ókili
ASTANA.KAZINFORM - Adam papıllomavırýsyna qarsy egý ulttyq naýqany jatyr moıny obyrynyń aldyn alýǵa baǵyttalǵan óte mańyzdy qadam, dep habarlaıdy Kazinform tilshisi.
Ortalyq kommýnıkatsııalar qyzmetindegi baspasóz máslıhatynda Dúnıejúzilik densaýlyq saqtaý uıymynyń Qazaqstandaǵy ókildiginiń vaktsınatsııaǵa suranys pen kelisimdi arttyrý jónindegi ulttyq úılestirýshisi Sáýle Qasymova málim etkendeı, Dúnıejúzilik densaýlyq saqtaý uıymynyń Eýropadaǵy aımaqtyq bıýrosynyń bastamasymen 2005 jyldan beri Eýropalyq ımmýndaý aptalyǵy ótkizilip keledi.
Bıylǵy jyly eýropalyq ımmýndaý aptalyǵy 27 sáýir men 3 mamyr aralyǵynda ótedi.
- Qazaqstanda 2024 jyly mańyzdy progreske qol jetkizildi. Adam papıllomavırýsyna qarsy ulttyq vaktsınatsııalaý naýqany bastaldy. Bul áıelder arasyndaǵy jetekshi onkologııalyq aýrýlardyń biri sanalatyn jatyr moıny obyrynyń aldyn alýǵa baǵyttalǵan óte mańyzdy qadam. Sonymen qatar, Qazaqstan DDSU ázirlegen «Immýndyq patrýl» tsıfrlyq bilim berý platformasyn mektep baǵdarlamasyna pılottyq túrde engizgen Eýropa óńirindegi birneshe elderdiń biri. Bul platforma qazaq jáne orys tilderine aýdarylyp, 10-12 jas aralyǵyndaǵy balalarǵa oıyn túrinde ımmýnıtet pen ınfektsııanyń aldyn alý negizderin úıretedi,- dedi S.Qasymova.
Baıandamashy aldaǵy jumystyń basym baǵyttaryn atady. Bul, eń aldymen, vaktsınalardyń qaýipsizdigine senimdi arttyrý jáne jedel áreket etý maqsatynda ımmýndaýdan keıingi jaǵymsyz qubylystardy baqylaýdy jáne tirkeýdi kúsheıtý. Sonymen qatar, medıtsına qyzmetkerleriniń patsıenttermen jáne ata-analarmen tulǵaaralyq qarym-qatynas jasaý salasyndaǵy biliktiligin arttyrý – dıalogty nyǵaıtý, kúmándi joıý jáne vaktsınatsııaǵa degen umtylysty arttyrý boıynsha júıeli jumys qajet.
Sondaı-aq S.Qasymova vaktsınatsııa 1974 jyldan beri álemde 154 mıllıonnan astam adamnyń ómirin saqtap qalǵanyn, bul 50 jyl ishinde ár mınýt saıyn, kún saıyn saqtalyp qalǵan alty adamnyń ómirin saqtap qalǵanyn eske saldy. Dál osy kezeńde náreste ólimi 40% tómendedi, al qyzylshaǵa qarsy vaktsına barlyq qutqarylǵan ómirdiń 60% qurady. Bul ulttyq ımmýndaý baǵdarlamalaryna ınvestıtsııany jalǵastyrýdyń mańyzdylyǵyn kórsetedi.
Buǵan deıin DDSU qus tumaýyn juqtyrý qaýpi tómen ekenin habarlaǵan.