Qazaqstanda ınfektsııanyń 52 túri boıynsha aýrý juqtyrý kórsetkishi tómendedi – mınıstrlik

NUR-SULTAN. QazAqparat – Qazaqstanda bıyl ınfektsııanyń 52 túri boıynsha aýrý juqtyrý kórsetkishi tómendegen. Jyldy qorytyndylaǵan QR Densaýlyq saqtaý birinshi vıtse-mınıstri Marat Shoranov osyndaı málimetti jarııa etti, dep habarlaıdy QazAqparat tilshisi.

«Jyldyń aıaqtalýyna birneshe kún qaldy. Jalpy respýblıkadaǵy epıdemıologııalyq ahýal turaqty. Halyq arasynda tyrysqaq, oba, dıfterııa, sirespe, polımelıt, bezgek aýrýlary tirkelgen joq. Ótken jylmen salystyrǵanda ınfektsııanyń 52 túri boıynsha aýrý juqtyrý kórsetkishi tómendedi. Onyń ishinde qyzylshamen aýyrý jaǵdaıy 3,7 ese, salmonellezben aýyrý 2 ese, menıngogok ınfektsııasyn juqtyrý deńgeıi 1,8 ese azaıdy. Sozylmaly vırýsty gepatıttiń taraý jaǵdaıy 42 paıyzǵa, týberkýlez 22 paıyzǵa, ótkir vırýsty gepatıt 9,3 paıyzǵa tómendedi», - dedi Marat Shoranov OKQ-da ótken baspasóz máslıhatynda.

Onyń aıtýynsha Qazaqstanda qazirgi ýaqytta ınfektsııalyq aýrýlarǵa qarsy ekpe jumystary jalǵasýda.

«Jyl boıy pandemııaǵa qaramastan tamaq ónimderiniń qaýipsizdigine qatań baqylaý júrgizdik. Osylaısha, tamaq ónimderin monıtorıngteý jumysynyń qorytyndysy boıynsha 28 myń túrli taýar tekserildi. Onyń ishinde 15 paıyzy tehnıkalyq talaptarǵa saı bolmaı shyqty. Atap aıtqanda qus eti, et, sút, kondıterlik ónimder, balyq ónimderiniń talaptarǵa sáıkes kelmeıtini anyqtaldy», - dedi ol.