Qazaqstanda ınfektsııalyq emes sozylmaly aýrýlarǵa shyǵyndardyń ósýi baıqalady

Bul týraly Úkimet otyrysynda QR Densaýlyq saqtaý mınıstri Eljan Birtanov málim etti, dep habarlaıdy QazAqparat.

«Qazaqstan Respýblıkasynyń densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasynyń negizgi baǵyttarynyń biri qoǵamdyq densaýlyq saqtaý qyzmetin qalyptastyrý bolyp tabylady. Dúnıejúzilik densaýlyq saqtaý uıymynyń anyqtamasy boıynsha qoǵamdyq densaýlyq saqtaý -  bul qoǵam qabyldaıtyn, uıymdastyrylǵan is-qımyl arqyly aýrýlardyń aldyn alý, ómir súrýdi uzartý jáne densaýlyqty nyǵaıtý jónindegi ǵylym men tájirıbe.   Qazaqstannyń qoǵamdyq densaýlyq saqtaý modeli Dúnıejúzilik densaýlyq saqtaý uıymy aıqyndaǵan qoǵamdyq densaýlyq saqtaýdyń negizgi on shuǵyl fýnktsııasynyń sheńberinde qurylatyn bolady.   Bul on fýnktsııa Dúnıejúzilik densaýlyq saqtaý uıymyna barlyq múshe memleket usynatyn halyqqa arnalǵan búkil qyzmettiń paketin qamtıdy»,-dedi mınıstr.

Vedomstvo málimetine qaraǵanda, onyń úlgisi Dúnıejúzilik Densaýlyq saqtaý uıymy belgilegen qoǵamdyq densaýlyq saqtaýdyń 10 negizgi jedel qyzmetteriniń tóńireginde jasalatyn bolady. Bul rette turǵyndardyń densaýlyǵy men turmys jaǵdaıyn epıdemıologııalyq qadaǵalaý; shuǵyl jaǵdaılardyń adam densaýlyǵy úshin qaýiptiligine mán berý, monıtorıng júrgizý; qaýipsiz qorshaǵan ortamen, eńbekpen, azyq-túlikpen qamtamasyz ete otyryp, densaýlyqty qorǵaý; strategııalyq basshylyq; bilikti kadrlarmen qamtamasyz etý; turaqty uıymdastyrý qurylymdarymen qamtamasyz etý; aqparattyq-túsindirý jumystary, kommýnıkatsııa jáne áleýmettik jumyldyrý; zertteý sharalaryn damytý bolyp tabylady.  

Eljan Birtanovtyń sózine qaraǵanda, sońǵy jyldary Qazaqstanda jalpy shyǵyndardyń 95-96 paıyzyn quraıtyn ınfektsııalyq emes sozylmaly aýrýlarǵa bólinetin  shyǵyndardyń ósýi baıqalady. Bul turǵyda júrek-qan tamyr jáne qaterli isik aýrýlary, sozylmaly respıratorlyq aýrýlar, dıabet jáne basqa da aýralar qamtylǵan. Qoǵamdyq densaýlyq úlgisi aýrýdy emdeý áreketterin olardyń aldyn alýǵa jáne basqarýǵa aýystyrý múmkindigin beredi.

Sondaı-aq, mınıstr 2016 jyly DDSU-men birlesip qoǵamdyq densaýlyq saqtaýdyń negizgi jedel qyzmetterine ózin-ózi baǵalaý júrgizilgendigi týraly habardar etti. Qyzmettiń mindeti  - yqpal etýdiń moıyndalǵan ádisteri arqyly halyqtyń densaýlyǵyn qorǵaý men nyǵaıtý. Onyń jumysy  basty 3 maqsatqa jetýge baǵyttalatyn bolady. Bul - dáleldi medıtsına negizindegi taldamaly jumystardy júrgizý, Qyzmetti ınstıtýtsıonaldy damytý jáne halyq densaýlyǵyn nyǵaıtý jónindegi sharalardy iske asyrý.