Qazaqstanda ındýstrııalyq saıasat týraly zań qabyldanady
«Álemdegi jáne Qazaqstandaǵy pandemııaǵa baılanysty kúrdeli jaǵdaıda 2020 jyldyń 7 aıynda ónerkásip 3,8 paıyzǵa ósti. Ásirese, farmatsevtıka 23,2 paıyzǵa, mashına jasaý 13,9 paıyzǵa, jeńil ónerkásip 7,3 paıyzǵa artty. El Prezıdenti Qasym-Jomart Toqaev óz Joldaýynda naqty tapsyrmalardy berip, jumystyń joǵary qarqynyn belgiledi. Óńdeý ónerkásibinde óndiris kólemin 1,5 ese ulǵaıtý boıynsha aýqymdy jumys júrgizý qajet. Osy maqsatqa jetý úshin básekelestik artyqshylyqtar men syrtqy naryqtaǵy eksporttyq múmkindikterdi birtindep arttyryp, ishki naryqta óńdeý ónerkásibiniń óndiristik áleýetin arttyrý boıynsha sharalar qabyldanady», - dedi Roman Sklıar Úkimettiń baspasóz ortalyǵynda jýrnalısterge.
Premer orynbasarynyń aıtýynsha, jyl sońyna deıin metall túrleriniń óndirisine qatysty otandyq kásiporyndar men qosymsha quny joǵary ónimderdi shyǵarý boıynsha olardy qaıta óńdeýshiler arasynda ózara tıimdi yntymaqtastyq mehanızmi jasalady.
«Instıtýtsıonaldyq negizdi saqtaı otyryp júrgiziletin jumystarǵa jeńildik berý úshin ındýstrııalyq saıasat týraly zań jobasymen jumys bastaldy. Qazirgi ýaqytta zań jobasy ázirlenip, ony bıznes jáne salalyq qaýymdastyqtar, ónerkásiptik kásiporyndar talqylaýda. Zań jobasynda qoldaý sharalarynyń quraldaryn keńeıtý, memleketten, kvazımemlekettik sektordan jáne jer qoınaýyn paıdalanýshylardan kepildendirilgen satyp alýlardy júzege asyrý sharalary eskerilgen», - dedi ol.
