Qazaqstanda indetti parotıtpen syrqattaný bir jyl ishinde 1,5 esege azaıdy

ASTANA. QazAqparat - QR Densaýlyq jáne áleýmettik damý mınıstrliginiń málimetterine qaraǵanda, 2015 jyldyń 11 aıynda Qazaqstanda indetti parotıtpen syrqattanýdyń kórsetkishi ótken jyldyń sáıkes kezeńimen salystyrǵanda 1,5 esege azaıyp, 100 myń turǵynǵa shaqqanda 23 jaǵdaı tirkeldi. Byltyrǵy 2014 jyldyń 11 aıynda bul kórsetkish 100 myń turǵynǵa shaqqanda 36 faktini quraǵan bolatyn. Bul týraly vedomstvonyń baspasóz qyzmetinen habarlandy.

Mınıstrlik aqparatyna qaraǵanda, Qazaqstanda halyqty josparly túrde indetti parotıtke qarsy ımmýnızatsııalaý qyzylshaǵa, qyzamyqqa jáne parotıtke qarsy biriktirilgen vaktsınatsııalaý arqyly júrgizilip keledi. Bul QR Profılaktıkalyq egý ulttyq kúntizbesine kiredi.

«Halyqty keń kólemdi vaktsınatsııalaý nátıjesinde sońǵy 20 jylda respýblıkada indetti parotıtpen syrqattaný deńgeıi 160 esege azaıdy. Halyq arasynda «svınka» dep atalatyn aýrý aýa-tamshyly juqpa jolmen syrtqy ortadaǵy turaqsyz vırýs arqyly týyndaıdy. Sonymen qatar, zaqymdaný kúndelikti turmys búıymdary, oıynshyqtar, juqpaly aýrýǵa shaldyqqan adamnyń silekeıi arqyly da bolýy múmkin. Aýrýdyń qajalyp ketken túrleri de jıi kezdesedi. Mundaı jaǵdaıda aýrýǵa shaldyqqan adamdar janyndaǵylarǵa zor qaýip tóndiredi. Aýrýǵa 3 pen 15 jas aralyǵyndaǵy balalar, sondaı-aq eresekterdiń de shaldyǵýy múmkin», delingen baspasóz baıanynda.

Densaýlyq mınıstrligi balalar arasynda aýrýdyń aldyn alýdyń birden-bir tásili vaktsınatsııa bolyp tabylatynyn da eskertedi. «Vaktsınalaýdan bas tartý - indetke beıim adamdardyń sanyn arttyryp, aýrý oshaǵynyń paıda bolýyna sebepker bolýy múmkin», - delingen baspasóz baıanynda.