Qazaqstanda ımmýndaý máselesine baılanysty onkúndik bastaldy
Onyń maqsaty - ımmýndaýdyń qoǵamnyń saýlyǵy men amandyǵy úshin mańyzdylyǵy týraly halyqtyń habardarlyǵyn arttyrý. Barsha álemde vaktsınalaý juqpaly aýrýlarmen kúresýdegi únemdi, qoljetimdi ári tıimdi qural retinde tanylǵan. Qazaqstanda Ulttyq egý kúntizbesine sáıkes 21 jupaly aýrýǵa qarsy halyqty vaktsıanalaý tegin júrgiziledi. Elimizdiń Ulttyq egý kúntizbesi Dúnıejúzilik densaýlyq saqtaý uımynyń (DDSU) usynymdaryna saı keledi. Halyqty ımmýndaý tegin júrgiziledi. Vaktsınalaý úshin DDSU sertıfıkattaǵan, sapasy kepildendirilgen vaktsınalar qoldanylady.
«Atap ótý kerek, vaktsınalaýdan bas tartý - elimizdegi epıdemıologııalyq jaǵdaıǵa keri áser etýi múmkin. Sondyqtan 2016-2019 jyldarǵa arnalǵan «Densaýlyq» Membaǵdarlamasynyń aıasynda Ulttyq ımmýnologııalyq profılaktıka regıstrin jasaý men engizý, juqpaly aýrýlardy eskertý men olardyń aldyn alý boıynsha qoǵamdy áleýmettik jumyldyrý boıynsha jospardy júzege asyrý, elimizdiń barlyq óńirlerindegi epıdemıologııalyq jaǵdaıdyń aldyn alý men ony baqylaý júıesin jetildirý josparlanyp otyr»,-dep atap ótilgen QR Densaýlyq saqtaý jáne áleýmettik damy mınıstrliginiń habarlamasynda.
QR Densaýlyq saqtaý jáne áleýmettik damý mınıstrligi SÓS Ulttyq ortalyǵy Búkilálemdik ımmýndaý aptalyǵy aıasynda ótkiziletin is-sharalardy uıymdastyrý men ótkizý boıynsha usynymdardy ázirledi.
Osy rette, bilim berý uıymdarynda «Aýrýlardyń aldyn alýdaǵy ımmýndaýdyń mańyzy», «Arnaıy jáne arnaıy emes vaktsınalaý degen ne?» taqyryptaryna dóńgelek ústelder ótkizý, «Vaktsına ma, álde aýrý ma? Qaısysy durys?» taqyrybyna baıqaý, sondaı-aq jetekshi medıtsınalyq mamandardy shaqyrý arqyly «Vaktsınalaý - aýrýdan qorǵaný», «Vaktsınalaýmen birge sapaly ómir» taqyryptaryna konferentsııalar, debattar men pikirsaıystar ótkizý usynyldy.
Búkilálemdik ımmýndaý aptalyǵy aıasynda ótkiziletin sharalar eń aldymen, halyq arasynda ımmýnoprofılaktıkaǵa degen senimdi kózqaras qalyptastyrý, halyqty, medıtsına qyzmetkerlerin ımmýnoprofılaktıkanyń qaýipsizdigi, juqpaly aýrýlarǵa qarsy qorǵanys qajettiligi jáne qoǵamdy ımmýndaýmen jetkiliksiz qamtýdyń saldary týraly aqparattandyrý sharalaryna baǵyttalǵan.