Qazaqstanda ymdaý tiline arnalǵan elektrondyq sózdik ázirlendi
ASTANA. KAZINFORM — Estý qabileti buzylǵan balalarǵa arnalǵan onlaın-vıdeo ymdaý tili sózdigi shyǵady. Bul týraly Oqý-aǵartý mınıstrligi málim etti.
Bul sózdik — ısharalardyń kórneki kórsetilimderi men avtomattandyrylǵan izdeý júıesi bar ınteraktıvti aqparattyq baza.
—Resýrsty ortalyqtyń resmı saıtynda qazaq jáne orys tilderinde tegin júktep alýǵa qoljetimdi. Qoldanýdyń qolaılylyǵyn arttyrý jáne qoljetimdilikti keńeıtý maqsatynda sózdiktiń mobıldi nusqasyn ázirleý jumystary júrgizilip jatyr. Onyń tanystyrylymy 2025 jylǵy respýblıkalyq tamyz konferentsııasy aıasynda ótedi, — delingen vedomstvo habarlamasynda.
Sózdik Oqý-aǵartý mınıstrliginiń Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy erekshe bilim berý qajettilikteri bar balalarǵa arnalǵan bilim berý salasyndaǵy tsıfrlyq sheshimderdi keńeıtý jumystary aıasynda júzege asyrylyp otyr.
Eske sala keteıik, buǵan deıin estý qabileti zaqymdalǵan balalarǵa arnalǵan 36 oqýlyq pen oqý-ádistemelik keshen ázirlengenin jazǵan edik.
Qazaq ǵalymy estý qabileti nashar balalardyń tilin shyǵaratyn ádisteme jasap shyǵarǵan edi.