Qazaqstanda ym-ısharat tili alǵash ret tolyq tsıfrlandyryldy
ASTANA. KAZINFORM — Qazaqstanda ınklıýzıvti bilim berýdi damytý baǵytyndaǵy mańyzdy jobalardyń biri – «e-Ymdaý» ym-ısharattyq tiliniń beıne sózdigi resmı túrde qoldanysqa engizildi. Bul týraly Oqý-aǵartý mınıstrligi málim etti.
Joba QR Oqý-aǵartý mınıstrliginiń «Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy» RMM ǵylymı-ádistemelik keńesi men Mektepke deıingi jáne orta bilim komıtetiniń qoldaýymen júzege asyrylǵan.
Jańa tsıfrlyq resýrs estý qabileti buzylǵan balalar men eresekterdiń bilim alýyna, qarym-qatynas jasaýyna jáne qoǵam ómirine belsendi aralasýyna múmkindik beredi.
— «e-Ymdaý» beıne sózdiginiń ereksheligi — sózder men uǵymdardy ym-ısharattar arqyly kórneki túrde usynatyn ınteraktıvti derekter bazasyna negizdelýi. Avtomattandyrylǵan izdeý júıesiniń kómegimen paıdalanýshylar qajetti sózdi jyldam taýyp, onyń durys ym-ısharattyq nusqasymen tanysa alady, — delingen habarlamada.
Beıne sózdik qazaq jáne orys tilderinde qoljetimdi. Ony App Store qosymshasy arqyly júkteýge nemese Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń resmı saıty arqyly onlaın formatta paıdalanýǵa bolady.
«e-Ymdaý» sózdigi 21 leksıkalyq taqyrypty qamtıdy.
«e-Ymdaý» beıne sózdigi estý qabileti buzylǵan azamattardyń aqparatqa qoljetimdiligin keńeıtýge, ym-ısharattyq tildi úırenýdi jeńildetýge jáne ınklıýzıvti bilim berý sapasyn arttyrýǵa baǵyttalǵan. Jobanyń iske qosylýy erekshe bilim berý qajettiligi bar azamattardyń sapaly bilim alýyna jáne qoǵam ómirine tolyqqandy qatysýyna qosymsha múmkindik beredi.
Eske sala keteıik, buǵan deıin Májilis depýtaty Ekaterına Smolıakova ym-ıshara tilin tolyqqandy zańnamalyq deńgeıde taný kerek degen pikir aıtqan bolatyn.
