Qazaqstanda HQO operatorlaryna 300 myńǵa jýyq beıneqońyraý túsken

ORAL. KAZINFORM – Halyqqa qyzmet kórsetý ortalyǵynyń qyzmetkerlerimen «HQO» qosymshasyndaǵy beıneqońyraý arqyly baılanysyp, memlekettik qyzmetter boıynsha keńes alýǵa jáne ótinish berýge bolady. Qazirgi ýaqytta 79 qyzmet túri qoljetimdi. 

«Azamattarǵa arnalǵan úkimet» memlekettik korporatsııasy» KEAQ BQO boıynsha fılıalynyń baspasóz qyzmetinen málim etkendeı, bul qyzmetti paıdalaný úshin qosymshanyń basty betinde "Beıne qyzmeti" batyrmasyn basý kerek. Qujattardy dıalogtyq terezede tirkeı alasyz, sodan keıin operator ótinishti qashyqtan qalyptastyrady. Memlekettik baj ekinshi deńgeıli bank qosymshalarynda tólenedi.

«Servıs óz ýaqytyn baǵalaıtyn azamattar úshin yńǵaıly. Eger halyqqa qyzmet kórsetý ortalyǵy úıden alys ornalassa nemese qarbalas ýaqytta jetý qıyn bolsa, azamattar HQKO qyzmetkerine beıneqońyraý shalyp, qyzmet ala alady. Qosymsha qazaqstandyqtar arasynda suranysqa ıe. Búgingi tańda qosymshanyń 400 myńǵa jýyq qoldanýshysy bar", - dep atap ótti memlekettik korporatsııanyń basqarma tóraǵasy Arman Kenjeǵalıev.

Aıta keteıik, beıneqońyraý arqyly qyzmet alýshylar mobıldi azamattar bazasynda nómirdi tirkeý jáne qaıta tirkeý, ETsQ alý jáne keri qaıtaryp alý, jyljymaıtyn múlikke quqyqtardy (aýyrtpalyqtardy) memlekettik tirkeý qyzmetterin alý úshin jıi júginedi.

Sonymen qatar qosymsha arqyly HQKO-ǵa barý ýaqytyn brondaýǵa, elektrondyq kezek talonyn alýǵa, qajetti halyqqa qyzmet kórsetý ortalyǵynyń ornalasqan jerin qaraýǵa jáne ózge de ózekti suraqtarmen tanysýǵa bolady.