Qazaqstanda hımııa ónerkásibi qalaı damyp jatyr
Vedomstvo basshysynyń aıtýynsha, agrohımııaǵa kóp kóńil bólinip otyr.
«Hımııa – aıryqsha nazar aýdarýǵa turarlyq baǵyt. Agrohımııaǵa úlken nazar aýdarylady. Ózderińiz jaqsy bilesizder, bizde bazalyq agrohımııalyq ónim bar, ıaǵnı ammofos, sary fosfor Qazaqstanda óndiriledi, ony «Qazfosfat» zaýyty shyǵarady. Qazaqstan óz qajettiligin tolyq jabady jáne eksportqa da shyǵady. Mańǵystaý oblysynda qýaty 400 myń tonnaǵa jetetin «QazAzot» azot tyńaıtqyshtaryn óndiredi. Bizde agrohımııa salasyn eki nemese úsh emes, 10 ese arttyrýǵa múmkindik bar», - dedi mınıstr Astanada Ondeu Expo ındýstrııalyq kórmesinde tilshilerge bergen suhbatynda.
M. Qarabaevtyń aıtýynsha, bul úshin birqatar iri jobalar júzege asyrylýda.
«Batys Qazaqstan oblysynda kalıı ken oryndary bar. Munda negizgi agrohımııalyq ónimdermen toqtap qalmaý kerek. Kúrdeli mıneraldy tyńaıtqyshtarǵa kóshý kerek. Ol úshin Jambyl oblysynda «EýroHım» jáne «Qazfosfat» kompanııalarynyń qatysýymen eki iri joba júzege asyp jatyr. Olar óz qýatyn birneshe ese arttyrýdy josparlap otyr», - dedi Marat Qarabaev.
