Qazaqstanda HEO Akseleratsııa ortalyǵy qurylady
ASTANA. KAZINFORM — Jańa alań tsıfrlyq ınnovatsııalar men JI salasyndaǵy quzyretterdi damytýdyń draıverine aınalýy tıis.
Halyqaralyq elektr baılanysy odaǵynyń (HEO) Jenevadaǵy shtab-páterinde Qazaqstan Respýblıkasy Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıevtiń HEO Bas hatshysy Dorın Bogdan-Martınmen kezdesýi ótti.
Kelissózderdiń basty nátıjesi Qazaqstanda Ortalyq Azııadaǵy tsıfrlyq transformatsııanyń negizgi habyna aınalýǵa tıis HEO Akseleratsııa ortalyǵyn (ITU Acceleration Centre) qurý týraly yntymaqtastyq týraly kelisimmen almasý boldy.
Jańa alań tsıfrlyq ınnovatsııalar men JI salasyndaǵy quzyretterdi damytýdyń draıverine aınalýy tıis. Ortalyqtyń negizgi mindetteri — kadrlyq áleýetti arttyrý, ozyq GovTech sheshimderin engizý jáne óńirdegi tsıfrlyq teńsizdikti eńserýge járdemdesý. Joba tek Qazaqstannyń ishki naryǵyna ǵana emes, sonymen qatar halyqaralyq ózara is-qımyldy damytýǵa baǵyttalǵan, bul HEO-nyń jahandyq basymdyqtaryn óńirlik deńgeıde naqty tájirıbelik sheshimderge aınaldyrýǵa múmkindik beredi.
— Biz Halyqaralyq elektr baılanysy odaǵymen yntymaqtastyǵymyzdyń naqty nátıje berip jatqanyna qýanyshtymyz. Biz bul ortalyqty tsıfrlyq ınnovatsııalar, JI salasyndaǵy daǵdylardy damytý, áleýetti arttyrý jáne óńirlik yntymaqtastyq úshin mańyzdy platforma retinde kóremiz, — dep atap ótti Jaslan Mádıev.
Kezdesý barysynda Jaslan Mádıevtiń jańadan qurylǵan «AI for Good» jahandyq komıssııasynyń quryltaıshy músheleri (Founding Members) qataryna engizilgeni atap ótildi. Qazaqstan bul organda memleket jáne úkimet basshylarymen, sondaı-aq álemdik tehnologııalyq kóshbasshylarmen qatar usynylǵan. Qazaqstan tarapy muny eldiń JI salasyndaǵy ádil jáne ınklıýzıvti jahandyq kún tártibin qalyptastyrýdaǵy róliniń artyp kele jatqanyna degen joǵary senimniń belgisi dep biledi.
ITU Acceleration Centre-di qurý — Qazaqstannyń HEO-men tyǵyz seriktestiginiń qısyndy jalǵasy. Bul bastama elimizdiń úzdik álemdik tájirıbelerdi ulttyq tsıfrlyq ekojúıege ıntegratsııalaýǵa qabiletti óńirlik kóshbasshy mártebesin rastaıdy. Ortalyqtyń jumysy Qazaqstanǵa ınnovatsııalyq tehnologııalardy engizýge jáne Ortalyq Azııadaǵy seriktesterimen tsıfrlandyrý tájirıbesimen bólisýge, búkil óńirdiń tehnologııalyq egemendigi men turaqty damýyn nyǵaıtýǵa múmkindik beredi.
Aıta ketelik Jaslan Mádıev sheteldik ınvestorlarǵa Qazaqstannyń tsıfrlyq bastamalaryn tanystyrǵan edi.
