Qazaqstanda haıýanattar baǵynyń sany azaıdy
ASTANA.KAZINFORM – Qazaqstanda haıýanattar baǵynyń sany sońǵy jyldary aıtarlyqtaı azaıǵanymen, saladaǵy qyzmet kólemi ósip keledi. 2025 jyly bul kórsetkish rekordtyq 2,6 mlrd teńgege jetti. Sonymen qatar kontaktili haıýanattar baqtaryna qatysty jańa talaptar engizilip, janýarlardy qorǵaý máselesi ózekti bolyp otyr. Bul týraly Energyprom jazdy.
Energyprom dereginshe, naryqtyń damý qarqyny birkelki bolǵan joq. 2017 jyly haıýanattar baqtarynyń qyzmet kólemi 733,8 mln teńgege deıin tómendedi. Odan keıin bul kórsetkish negizinen ósip otyrdy. 2020 jyly kólemi 1,6 mlrd teńgege jetkenimen, 2021 jyly 1,3 mlrd teńgegedeıin qysqardy. 2022 jyldan bastap úzdiksiz ósim baıqalyp, 2025 jylǵa qaraı qyzmet kólemi shamamen eki ese artty.
– Qyzmet kóleminiń ulǵaıýy haıýanattar baqtarynyń sanynyń azaıýy aıasynda boldy. 2025 jyly Qazaqstanda 8 haıýanattar baǵy, onyń ishinde 3 kontaktili haıýanattar baǵy, sondaı-aq 1 okeanarıým jumys istedi. Salystyrý úshin aıtsaq, 2017 jáne 2018 jyldary elimizde 20 haıýanattar baǵy bolǵan. Osylaısha, 2025 jylǵa qaraı olardyń sany 2017 jylmen salystyrǵanda 60%-ǵa qysqardy, – delingen maqalada.
Sonymen qatar kontaktili haıýanattar baqtarynyń sany budan da jyldam azaıdy. 2017 jyly olardyń sany 14bolsa, 2019 jyly – 11, 2021 jyly – 6, al 2025 jyly 3 qana qaldy. Eń joǵary kórsetkishpen salystyrǵanda olardyń sany tórt eseden astam azaıǵan.
- Bul qysqarý zańnamadaǵy ózgeristermen de baılanysty. 2025 jylǵy 1 qańtardan bastap Qazaqstanda kontaktili haıýanattar baqtarynyń, kóshpeli haıýanattar baqtarynyń, kóshpeli okeanarıýmdardyń jáne aýyl sharýashylyǵy men úı janýarlary kórmelerinen basqa kóshpeli janýarlar kórmeleriniń qyzmetine tyıym salyndy. Bul talap «Janýarlarǵa jaýapkershilikpen qaraý týraly» zańda belgilengen, – dep atap ótilgen taldaýda.
Sonymen qatar janýarlarǵa dóreki qaraý máselesi tek kontaktili haıýanattar baqtarymen shektelmeıdi. 2025 jáne 2026 jyldary Almaty haıýanattar baǵynda kelýshilerdiń múıiztumsyq pen arystanǵa tas laqtyrǵan eki jaǵdaıy tirkeldi. Sonymen qatar, janýarlardy ruqsatsyz tamaqtandyrý da ózekti másele bolyp otyr. Mamandardyń aıtýynsha, kelýshiler ákelgen azyq janýarlardyń densaýlyǵyna zııan keltirýi múmkin.
Byltyrǵy resmı statıstıkada elimizde áli de 3 kontaktili haıýanattar baǵy kórsetilgen. Olar Astana qalasy men Abaı oblysynda ornalasqan. Óńirler boıynsha qarastyrsaq, haıýanattar baqtary elimizdiń 20 óńiriniń 7-sinde ǵana jumys isteıdi. Eldegi jalǵyz okeanarıým bar.
– 2025 jyly Qazaqstandaǵy haıýanattar baqtary men okeanarıýmdaǵy janýarlar, qustar jáne balyqtardyń jalpy sany 14,4 myń basqa jetip, ótken jylmen salystyrǵanda ózgergen joq. 2015 jylmen salystyrǵanda bul kórsetkish 17%-ǵa ósti. Eń joǵary kórsetkish 2018 jyly tirkelip, onda 17,5 myń janýar, qus jáne balyq bolǵan. Keıingi jyldary olardyń sany 12 myńnan 16,8 myńǵa deıin ózgerip otyrdy, – dep kórsetilgen zertteýde.
Aıta keteıik, Almaty haıýanattar baǵynda áıel arystanǵa tas laqtyrǵan.
