Qazaqstanda halyqtyń jalaqysy Halyqaralyq Eńbek Uıymynyń qaǵıdattaryna sáıkes qorǵalatyn bolady
ASTANA. QazAqparat - Búgin Parlament Májilisiniń jalpy otyrysynda palata depýtattary «Jalaqyny qorǵaý týraly konventsııany (95-konventsııa) ratıfıkatsııalaý týraly» zań jobasyn maquldady.
Konventsııa memlekettiń jalaqyny qorǵaý normalaryn qamtamasyz etýge baǵyttalady. Bul Konventsııany Halyqaralyq Eńbek Uıymyna múshe 97 memleket qabyldaǵan. Al buǵan qajetti alǵysharttar búgingi tańda Qazaqstanda da qalyptasyp otyr. «Álemdik damýdyń jahandanýy men Qazaqstannyń damyǵan otyz eliniń qataryna qosylý baǵytynda eńbekaqyny retteý, halyqaralyq standarttardy engizý, adam kapıtalyn damytý turaqtylyqty saqtaýdyń mindetti sharty bolyp tabylady. Osyǵan oraı, jalaqynyń Halyqaralyq Eńbek Uıymynyń qaǵıdattaryna sáıkes qorǵalýy asa mańyzdy. Konventsııany ratıfıkatsııalaýdyń ózektiligi de osynda»,- deıdi Eńbek jáne halyqty áleýmettik qorǵaý mınıstri Tamara Dúısenova. Onyń aıtýynsha, Konventsııanyń uıǵarymdary ekonomıkanyń barlyq salalaryna qatysty jáne jalaqy esepteletin nemese tólenetin adamdardyń barlyǵyna birdeı qoldanylady. Budan bólek, Konventsııada jalaqyny ýaqytyly jáne júıeli tóleýdiń, ony shekten tys ustap qalýlardan, kásiporyn bankrot bolǵan nemese taratylǵan jaǵdaıda jalaqyny qorǵaý qarastyrylady.
