Qazaqstanda halyqty ımmýndaý baǵdarlamasyn basqarýdy jetildirý usynyldy

NUR-SULTAN. QazAqparat – Sanıtarııalyq-epıdemıologııalyq qyzmetti jańǵyrtýdyń jol kartasyn ázirleý kerek. Bul týraly Parlament Májilisindegi Úkimet saǵatynda densaýlyq saqtaý problemalaryn talqylaý kezinde depýtat Jámılá Nurmanbetova málim etti, dep habarlaıdy QazAqparat tilshisi.

«QazVac vaktsınasyna jeke toqtalǵym keledi. Qazaqstan bizdiń ǵalymdarymyz ázirlegen óz vaktsınasy bar álem elderiniń qataryna endi. Kelesi qadam qazaqstandyq vaktsınany Dúnıejúzilik densaýlyq saqtaý uıymynyń moıyndaýy bolyp otyr», - dedi J. Nurmanbetova.

Sonymen qatar ol SES-tiń ónimdi baqylaý jónindegi fýnktsııasyna qatysty toqtaldy.

«Ókinishke qaraı, ónim qaýipsizdigi monıtorınginiń nátıjeleri sáıkes kelmeıtin taýarlardy anyqtaýdyń jáne gendik túrlendirilgen organızmderi (GTO) bar ónimderdi ákelýdiń ulǵaıǵanyn kórsetip otyr. Osyǵan baılanysty azyq-túlik qaýipsizdigin qamtamasyz etý tetikterin qaıta qaraý jáne azyq-túlik naryqtaryn qorǵaýdyń tıimdi tásilderin qabyldaý talap etiledi. Tutastaı alǵanda, Sanıtarııalyq-epıdemıologııalyq qyzmetti jańǵyrtýdyń jol kartasyn ázirleý qajet dep esepteımiz, onda normatıvtik-quqyqtyq aktilerdi jetildirýge, zerthanalardy jańa jabdyqtarmen jaraqtandyrýǵa, ǵımarattar men qurylysjaılardy qazirgi zaman talaptaryna saı keltirýge, kadrlyq áleýetti kúsheıtýge jáne ǵylymdy damytýǵa erekshe kóńil bólinedi», - dedi depýtat.

«Budan bólek, halyqty ımmýndaý baǵdarlamasyn basqarýdy jetildirý talap etiledi. Vaktsınamen eńseriletin aýrýlar boıynsha egjeı-tegjeıli jáne sıtýatsııalyq taldaýǵa negizdelgen uzaq merzimdi jospar ázirleý usynylady. Halyqty sanepıdemologııalyq ahýal týraly anyq ári durys málimettermen habardar etý úshin BAQ-pen ózara baılanysty arttyrý da mańyzdy másele bolyp otyr», - dedi ol.

Budan buryn habarlanǵandaı, Jámılá Nurmanbetova sanıtarııalyq-epıdemıologııalyq qyzmet salasyndaǵy kemshilikterdi aıtty.