Qazaqstanda Halyqaralyq týrızm jáne meımandostyq ýnıversıteti ashyldy
Ortalyq Azııanyń ejelgi tarıhı qalalarynyń biri - úlken týrıstik áleýetke ıe Túrkistanda ornalasqan ýnıversıtettiń online-formattaǵy ashylý saltanatynda Mádenıet jáne sport mınıstri A.Raıymqulova, Túrkistan oblysynyń ákimi Ó.Shókeev, Ózbekstan Premer-mınıstriniń orynbasary - «Jibek joly» Halyqaralyq týrızm ýnıversıtetiniń rektory A.Abdýhakımov, BUU Jahandyq kommýnıkatsııalar departamentiniń ókili V.Samek jáne ýnıversıtet rektory M.Mýrzamadıeva quttyqtaý sóz sóıledi.
Shaqyrylǵan spıkerler ýnıversıtettiń damýyna, halyqaralyq yntymaqtastyq salasynda qoldaý kórsetýge ýáde berdi.
«Jańa ýnıversıtet Qazaqstan Respýblıkasynda týrıstik qyzmetti damytýdyń memlekettik baǵdarlamasy aıasynda quryldy. Týrızm jáne qonaqjaılylyq salasyndaǵy mamandardy daıarlaý úshin Qazaqstandaǵy halyqaralyq deńgeıdegi alǵashqy mamandandyrylǵan ýnıversıtetti ashýdyń mańyzdylyǵyn atap ótken jón. Onyń túlekteri halyqaralyq standarttyń qos dıplomyn - qazaqstandyq jáne sheteldik seriktes ýnıversıtetten alýǵa múmkindik alady», - delingen Mádenıet jáne sport mınıstrligi aqparatynda.
Vedomstvo málimetinshe, birlesken bilim berý baǵdarlamalary týrıstik bıznestiń naqty qajettilikterin eskere otyryp ázirlenedi jáne «3 + 1» shemasy boıynsha eń jaqsy halyqaralyq tájirıbege negizdelgen. Oqytýshylar quramyna qazaqstandyq jáne sheteldik professorlar pýly, týrızm jáne servıs salasyndaǵy jetekshi kompanııalardyń top-menedjerleri kiredi.
Atap aıtqanda, ýnıversıtette Halyqtar dostyǵy ýnıversıtetiniń (Reseı), Jibek joly ýnıversıtetiniń (Ózbekstan), sondaı-aq Túrkııa, Grýzııa, Shveıtsarııa ýnıversıtetteriniń professorlaryn tartý týraly kelisimsharttary bar. Munyń bári ýnıversıtet stýdentterine joǵary deńgeıdegi teorııalyq bilim alýǵa jáne sheteldik tájirıbeden ótýge, sonyń ishinde BUU Dúnıejúzilik týrızm uıymynda (UNWTO) qoldaý kórsetýge múmkindik beredi.
