Qazaqstanda halyqaralyq reıster kezeń-kezeńimen ashylady: Ruqsat berilgen memleketter tizimi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Beıbit Atamqulov halyqaralyq áýe reısteriniń qalaı jandanatynyn túsindirdi, dep habarlaıdy QazAqparat tilshisi.

«Koronavırýs ınfektsııasyn taratpaý týraly Vedomstvoaralyq komıssııa jaqynda ǵana jınalys ótkizip, 1 maýsymnan bastap, úsh memleketke áýe reısterin jandandyrý máselelerin qarastyrýǵa ruqsat berdi. Olar – Ońtústik Koreıa, Qytaı jáne Ázerbaıjan. Nege bul elder tańdalyp alyndy? Birinshiden, COVID-19 boıynsha ondaǵy ahýalǵa baǵa berildi. COVID-19 boıynsha halyqaralyq reıtıng bar jáne atalǵan úsh memleket barynsha qaýipsiz elder qatarynda», - dep túsindirdi spıker Ortalyq kommýnıkatsııalar qyzmetinde ótken esep berý brıfınginde.

Onyń aıtýynsha, ekinshi kezeńde Germanııa, BAÁ, Chehııa men Taılandqa reıs jandandyrý qarastyrylady.

«Polsha men Majarstanǵa da ruqsat alyp qalýymyz múmkin. Óıtkeni, onda da qaýipsizdik deńgeıi aıtarlyqtaı joǵary. Ekinshi kezeń shamamen 15 maýsymnan keıin qolǵa alynady. Sheteldegi áriptesterimmen únemi baılanysta otyramyn. Túrkııanyń kólik mınıstrimen sóıleskenimde, olardyń Antalııaǵa reıs ashýǵa múddeli ekenin, 20 maýsymdy arnaıy belgilep otyrǵandaryn aıtty. Bul jumystardy áli de pysyqtaımyz», - dedi B. Atamqulov.