Qazaqstanda Halyqaralyq otbasy kúni atalyp ótýde
ASTANA. 15 mamyr. QazAqparat - Búgin Qazaqstanda Halyqaralyq otbasy kúni atalyp ótýde. Atalmysh mereke 1993 jyly BUU Bas Assambleıasynyń qararymen bekitilgen.
Osy kúnderi Astanada dástúrli túrde januıada ózara syılastyq, adamgershilik qundylyqtardy dáripteýge, otbasylyq dástúrlerdi jalǵastyrýǵa baǵyttalǵan túrli sharalar ótkizilýde.
Osylaısha búgin Astanadaǵy M. Gorkıı atyndaǵy orys drama teatrynda ótken kontsert barysynda elordanyń eleýli januıalary quttyqtaldy. Onda «Nur Otan» partııasynyń jáne ákimdik ókilderi eń belsendi ári úlgili otbasylarǵa estelik syılyqtar men dıplomdar tabystady. Olardyń qatarynda 50 jyl buryn otaý qurǵan juptar da boldy.
Elordalyq mektepterde otbasy týraly eń úzdik áńgimelerge baıqaý jarııalandy. Otbasylyq sporttyq jarystar men «Meniń ákem eń jaqsy» atty konkýrstar uıymdastyryldy. Al 12 mamyrda №59 mektepte ákeler sleti ótkizildi. Oǵan bas qalamyzdyń 700-den astam ákeleri qatysqan bolatyn.
M. Ótemisuly atyndaǵy Oqýshylar saraıynda «Otbasy-jasóspirim-qoǵam» atty fotokórme, «Otbasy jasóspirim kózimen» dep atalatyn semınar bolyp ótti.
Bir aı boıy jýrnalıster arasynda otbasy taqyrybynda jazylǵan eń úzdik maqala baıqaýy da eleýli oqıǵa boldy.
Múgedek balalar qoǵamy qamkóńil jetkinshekterge arnap «Tartymdy álem» atty festıval ótkizdi. Onda múmkindigi shekteýli balalar ózderiniń sheksiz shyǵarmashylyqtary men múmkindikterin kórsetti.
Elordanyń eleýli januıalaryn quttyqtaýǵa arnalǵan gala-kontsert Astana ákimdiginiń Halyqaralyq otbasy kúnine oraı uıymdastyryp otyrǵan qorytyndy sharasy bolatyn.
