Qazaqstanda halyqaralyq kelisimsharttar daıyndaý josparly túrde júzege asatyn bolady - SІM

ASTANA. QazAqparat - Qazaqstanda halyqaralyq kelisimsharttar daıyndaý bekitilgen jospar aıasynda júzege asatyn bolady. Búgin Senattyń Halyqaralyq qatynastar, qorǵanys jáne qaýipsizdik komıtetiniń depýtattarymen kezdesýi barysynda QR Syrtqy ister mınıstri Erlan Ydyrysov osylaı málimdedi.

Syrtqy saıasat vedomstvosy basshysynyń aıtýynsha, mınıstrlik jumysynyń mańyzdy baǵyty - memlekettiń halyqaralyq kelisimsharttarǵa qol qoıý men ony atqarý.

«Biz osy jumysty perspektıvalyq jospar aıasynda atqaratyn bolamyz. Osyǵan oraı, syrtqy saıasat vedomstvosy aǵymdaǵy jylǵa jáne 2016-2018 jyldarǵa arnalǵan halyqaralyq kelisimsharttardy daıyndaý josparyn bekitti. Bul - bizdiń elimizde buryn júzege aspaǵan jańa bastama. Parlament depýtattarynyń qoldaýynyń arqasynda biz halyqaralyq kelisimsharttardy daıyndaý men qol qoıýdy josparly túrde júzege asyratyn bolamyz», - dedi SІM Erlan Ydyrysov.

Onyń sózine qaraǵanda, mundaı tájirıbe kóp elderde qoldanylmaǵan, sırek kezdesetin úderis. Osyǵan oraı, mınıstr mundaı tájirıbede keıbir kemshilikter oryn alyp otyratynyn da joqqa shyǵarmaıdy.

Degenmen, vedomstvoaralyq komıssııa otyrysynda bolýy yqtımal olqylyqtar qaralyp, aldaǵy jumystarǵa túzetýler engizilip otyrady.

«Munyń bári Elbasynyń Jarlyǵy aıasynda bekitilgen. Jalpy, biz bul baǵytta Prezıdenttiń kelisimimen jumys isteımiz, ıaǵnı 2015 jylǵa jáne 2016-2018 jyldarǵa arnalǵan jospardy Memleket basshysy qoldady», - dedi SІM.