Qazaqstanda halyqaralyq aýyl týrızmi jobasy júzege asyrylmaq
ASTANA. QazAqparat - Qazaqstanda halyqaralyq aýyl týrızmi jobasy júzege asyrylmaq. Bul týraly búgin Astana ákimdigindegi týrıstik jáne qonaq úı bıznesi salasyndaǵy qyzmetterdi retteý máselesin qozǵaǵan óńirlik shtab otyrysy aıasynda BAQ ókilderine suhbat bergen «Qazaqstannyń qonaq úıler men meıramhanalar qaýymdastysy» ZTB-nyń vıtse-prezıdenti Natalıa Sergeenkova aıtty, dep habarlaıdy QazAqparat.
«Búgingi kúni bizdiń qaýymdastyq aýyl týrızmin damytýǵa baǵyttalǵan úlken halyqaralyq jobaǵa qatysyp jatyr. Osydan ne bári eki apta buryn ǵana biz Almaty men Jambyl oblystaryna baryp, atalǵan jobaǵa qyzyqty bolarlyq oryn tańdap qaıttyq», - dedi ol.
Qaýymdastyq vıtse-prezıdentiniń aıtýynsha, jobany júzege asyratyn oryn retinde Almaty túbindegi ıÝNESKO qamqorlyǵyna alynǵan Tańbaly tas mekeni tańdap alynǵan.
«Ol óte qyzyqty oryn bolǵanymen búgingi kúni eshqandaı ınfraqurylymy joq. Jergilikti adamdar da, sheteldikter de oǵan barynsha qyzyǵýshylyq tanytady. Óıtkeni, ondaı oryn álemde óte az. Biz sol jerde aýyl týrızmin damytqymyz keledi. Másele aýyl úılerin ashý tóńireginde bolyp otyr. Ol qolǵa alynsa taqaý mańdaǵy aýyl turǵyndaryna týrızmmen aqsha tabýǵa jaqsy múmkindik bolar edi», - dedi Sergeenkova.
Onyń sózine qaraǵanda, týrısterge arnalǵan úılerdiń standarttary qazirgi ýaqytta jasalyp jatyr.
«Bastapqyda 10-15 úıdi qamtýdy esepke alyp otyrmyz. Qazirgi ýaqytta daıyndyq jumystary júrgizilýde. Joba úsh jylǵa, atap aıtqanda 2017, 2018, 2019 jyldarǵa eseptelingen. Joba qolǵa alyndy. Degenmen, ózderińizde ınfraqurylym, máselen qarapaıym joldyń ózi bolmasa eshteńeniń de jasalmaıtyndyǵyn jaqsy túsinesizder. Aǵymdaǵy jyly Tańbalyǵa deıingi jol jóndeletin bolady», - dedi ol.
