Qazaqstanda halyq saılaýǵa asa úlken jaýapkershilikpen qaraıdy - halyqaralyq baıqaýshy

KÓKShETAÝ. QazAqparat - Qazaqstan Respýblıkasynyń Parlamenti Májilisi men máslıhat depýtattarynyń saılaýynda Aqmola oblysy boıynsha jumys istegen halyqaralyq baıqaýshylar óńirlik kommýnıkatsııalar qyzmetinde jýrnalıstermen brıfıng ótkizdi, dep habarlaıdy QazAqparat tilshisi.

Brıfıngke Qazaqstandaǵy Tatarstan Respýblıkasynyń quzyretti ókili Denıs Valeev, Tatarstan Respýblıkasy Prezıdentiniń Syrtqy baılanys departamenti dırektorynyń orynbasary Marat Bektemirov, qoǵamdyq-saıası jáne kommertsııalyq uıymdarmen baılanys boıynsha bólimniń bas keńesshisi Aleksandr Maratkanov qatysyp, baıqaýshy retindegi oı-pikirin bólisti.

Tatarstandyq baıqaýshylar Aqmola oblysynyń birqatar óńirinde bolyp, saılaýda halyqtyń belsendiligin baıqaǵan.

«Kókshetaý qalasy, jalpy, Aqmola oblysynda ótken saılaý oń áser qaldyrdy. Biz óńirdegi 10 saılaý ýchaskesinde boldyq. Sonda baıqanymyz - sanıtarlyq shekteýler jáne demalys kúnine qaramastan daýys berýshiler óte belsendi boldy. Tipti, biz bolǵan saılaý ýchaskelerinde daýys berýshilerdiń legi bir tolastamady. Baıqaǵanymyzdaı sizderde turǵyndar saılaýǵa asa úlken jaýapkershilikpen qaraıdy eken. Adamdardyń kóńil-kúıi kóterińki boldy», - dedi Denıs Valeev.

Sonymen qatar, delegatsııa óńirde ótip jatqan Májilis pen máslıhat depýtattarynyń saılaýy Qazaqstan Respýblıkasynyń zańnamasyna, memleket qabyldaǵan halyqaralyq mindettemelerge sáıkes bolǵanyn atap ótti.

«Májilis pen máslıhat depýtattarynyń saılaýyna kúmán keltirerlikteı ulttyq zańnamanyń buzylýy tirkelgen joq», - dedi Aleksandr Maratkanov.

Tatarstan Respýblıkasy Prezıdentiniń Syrtqy baılanys departamenti dırektorynyń orynbasary Marat Bektemirovtiń pikiri de áriptesteriniki sııaqty bir jerden shyqty.