Qazaqstanda halyq sany 17 mln. 439,3 myń adamǵa jetti
ASTANA. QazAqparat - 2015 jylǵy 1 aqpanda elimizdegi halyq sany 17 439,3 myń adamdy qurady. Sonyń ishinde qalalyqtar - 9 646,3 myń (55,3 paıyz), aýyldyqtar - 7 793,0 myń adamdy (44,7 paıyzdy) qurady. Osylaısha, 2014 jylǵy 1 aqpanmen salystyrǵanda halyq sany 252,3 myń adamǵa nemese 1,5 paıyzǵa ósip otyr.
QR Ulttyq ekonomıka mınıstrligi Statıstıka komıtetiniń baspasóz qyzmetinen habarlanǵanyndaı, 2015 jyly qańtarda týylǵandar sany 33,4 myń adamdy qurap, 2014 jylǵy qańtarǵa qaraǵanda 0,9 paıyzǵa kemigen. Bunda jalpy koeffıtsıent 1000 adamǵa 22,44 týýdy qurady.
Qarastyrylyp otyrǵan kezeńde qaıtys bolǵandar sany 11,7 myń adamdy qurap, 2014 jylǵy qańtarǵa qaraǵanda 0,5 myń adamǵa nemese 4,1 paıyzǵa azaıǵan. Ólim-jitimniń jalpy koeffıtsıenti 1000 adamǵa 7,89 qaıtys bolǵandardy qurady.
«2015 jylǵy qańtarda respýblıka halqynyń tabıǵı ósimi byltyrǵy jylmen salystyrǵanda 0,2 myń adamǵa nemese 1 paıyzǵa artyp, 21,7 myń adamdy qurady. Tabıǵı ósimniń jalpy koeffıtsıenti 1000 adamǵa shaqqanda 14,55 adamdy qurady», - delingen baspasóz baıanynda.
Sonymen qatar, kóshi-qon polıtsııasy organdary usynǵan málimetterdi óńdeý nátıjesinde, 2015 jylǵy qańtarda elimizge turǵylyqty turýǵa kelgenderdiń tirkelý sany (kóship-qonýshylar) 2014 jylǵy qańtarmen salystyrǵanda 2,5 paıyzǵa ósip, 1 730 adamdy quraǵan. Elimizden ketkenderdiń tirkelý sany 12,2 paıyzǵa kóbeıip, 1 589 adamǵa jetti, bul rette, kóshi-qonnyń aıyrymy 141 adam bolǵan.
«Esepti kezeńde el ishinde kóship-qonýshylar sany 13 804 adamǵa nemese 49,3 paıyzǵa kóbeıip, 41 796 adamdy qurady. Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 40,4 paıyzy tıesili. Óńiraralyq kóshi-qonnyń oń aıyrymy Almaty (2 690 adam), Astana (473 adam) qalalarynda jáne Aqmola (124 adam), Mańǵystaý (78 adam), Aqtóbe (11 adam) oblystarynda qalyptasty», - delingen baspasóz baıanynda.
