Qazaqstanda halyq arasynda AQTQ ınfektsııanyń taralý deńgeıi 0,15 paıyzdan joǵary emes
ASTANA. Jeltoqsannyń 1-i. QazAqparat /Qanat Mámetqazyuly/ - Qazaqstanda halyq arasynda ınfektsııanyń taralý deńgeıi 0,15 paıyzdan joǵary emes. Bul týraly Densaýlyq saqtaý mınıstrliginde «Qazaqstandaǵy AQTQ/JQTB boıynsha jaǵdaı jáne onyń aldyn alý» atty taqyrypta ótken brıfıngte Densaýlyq saqtaý mınıstrligi Memlekettik sanepıdqadaǵalaý basqarmasynyń bastyǵy Aıtmaǵanbet Jolsharınov málim etti,
dep habarlaıdy QazAqparat.
«AQTQ juqpasynyń ınektsııalyq jolmen berilýin tómendetý maqsatynda elimizdegi osy aýrý túri kóp taraǵan óńirlerde - Pavlodar jáne Temirtaý qalalarynda ilki jobalar byltyrdan bastap júzege asa bastady. Atap aıtqanda, eki qalada AQTQ-ny juqtyrǵan ınektsııalyq esirtkini tutynýshy 50 adam úshin metadonmen almastyrý terapııasynyń ilki sharalary engizildi. Sonymen qatar, 2006-2010 jyldarǵa arnalǵan baǵdarlama aıasynda da tıisti jumystar atqarylýda. Osy maqsatta jyl saıyn respýblıkalyq bıýdjetten qarajat qarastyrylady. Máselen, bıyldyń ózinde AQTQ dertiniń aldyn alý sharalaryna 59,4 mln. teńge bólindi», dedi A. Jolsharınov.
Onyń aıtýynsha, Dúnıejúzilik densaýlyq saqtaý uıymy sarapshylarynyń baǵalaýy boıynsha, qazirgi kúni Qazaqstan Respýblıkasy epıdemııanyń shoǵyrlaný satysynda tur. Atap aıtqanda, halyq arasynda bul ınfektsııanyń taralý deńgeıi 0,15 paıyzdan joǵary emes. Bul Shyǵys Eýropa men Ortalyq Azııa óńirlerindegi orta deńgeıden birneshe esege tómen.
