Qazaqstanda halyqtyń jartysynan kóbi ómir súrý deńgeıine qanaǵattanady

ASTANA. KAZINFORM — Halyqtyń ómir súrý sapasy týraly zertteý nátıjeleri jarııalandy, dep habarlaıdy Ulttyq statıstıka bıýrosynyń baspasóz qyzmeti.

— Úı sharýashylyqtaryna júrgizilgen iriktemeli zertteý kórsetkendeı, halyqtyń 53,2%-y óz ómir súrý jaǵdaılaryna qanaǵattanatynyn aıtqan. Al 46,3%-y jartylaı qanaǵattanatynyn bildirgen. Aýyldyq jerlerde ómir súrý jaǵdaıyna qanaǵattanatyndar (65,4%) qalalyqtarǵa (51,7%) qaraǵanda kóp. 2024 jylmen salystyrǵanda ómir súrý jaǵdaılaryna qanaǵattaný deńgeıi 52,5%-dan 53,2%-ǵa ósken, — delingen bıýro habarlamasynda.

Densaýlyqqa qatysty suraqta respondentterdiń 51%-y óz densaýlyǵyna qanaǵattanatynyn, 46,4%-y jartylaı qanaǵattanatynyn aıtqan. Bul kórsetkish ótken jylmen salystyrǵanda 1,5%-ǵa artqan (2024 jyly 49,5% bolǵan).

Materıaldyq turǵydan qaraǵanda, 73,6% adamdar ózderin ortasha deńgeıde qamtamasyz etilgen dep sanaıdy.

Saýalnamaǵa qatysýshylardyń 65,8%-y týystary men tanystarynan moraldyq qoldaý alatynyna senimdi.

Sonymen qatar, 73% adam óz bolashaǵyna senimdi jáne jaǵdaıdyń jaqsaratynyna úmitti.

Budan buryn elorda kúnine arnalǵan qyzyqty statıstıka jarııalaǵan edik.