Qazaqstanda halyqtyń naqty tabysy bir jyldan keıin alǵash ret artty

USB deregi boıynsha, 2026 jylǵy I toqsanda Qazaqstan halqynyń naqty aqshalaı tabysy sońǵy jyly alǵash ret oń serpinge shyqty. Inflıatsııanyń baıaýlaýy halyqtyń naqty tabysynyń jyl ishinde alǵash ret oń dınamıkaǵa shyǵýyna yqpal etti.

— Ótken jylǵy sáıkes kezeńmen salystyrǵanda ol 0,1%-ǵa ósti. Halyqtyń jan basyna shaqqandaǵy ortasha nomınaldy aqshalaı tabysy aıyna 252 619 teńge bolǵan. Bul 2025 jylǵy I toqsan deńgeıinen 11,8%-ǵa joǵary. Inflıatsııalyq protsesterdiń birtindep baıaýlaýy, atap aıtqanda tutyný baǵasynyń turaqtanýy mańyzdy faktor boldy, — delingen habarlamada.

Aıta ketý kerek, jyl basynan beri jyldyq ınflıatsııa deńgeıi turaqty baıaýlap, aǵymdaǵy jylǵy maýsymda 10,3%-ǵa deıin tómendedi.

Jaldamaly jumystan túsken kirister halyqtyń barlyq aqshalaı kirisiniń úshten ekisin quraıtyn azamattardyń ál-aýqatynyń negizgi kózi bolyp qala beredi. Bul rette eńbekaqy tóleý deńgeıi ekonomıka salalarynda aıtarlyqtaı erekshelenedi.

2026 jylǵy I toqsannyń qorytyndysy boıynsha ortasha aılyq nomınaldy jalaqy 9,1%-ǵa ósse, naqty jalaqy ındeksi 97,7%.

Sonymen qatar, eńbekaqy tóleý dınamıkasy ekonomıkalyq qyzmet túrlerinde aıtarlyqtaı erekshelendi.

Ótken jylǵy sáıkes kezeńmen salystyrǵanda ortasha aılyq jalaqynyń eń joǵary ósýi aýyl sharýashylyǵynda — 20,3%-ǵa (naqty mánde-7,7-ǵa), qarjy jáne saqtandyrý qyzmetinde — 18,1% — ǵa (5,7%), kólik pen qoımalaýda-12,9%-ǵa (1,1%), óńdeý ónerkásibinde-14% — ǵa (2,1%) tirkeldi. Bul birqatar salalarda, eń aldymen ekonomıkanyń munaı emes sektorynda eńbekaqynyń ozyńqy ósip otyrýynyń saqtalýyn aıǵaqtaıdy.

Ekonomıkanyń munaı emes sektoryndaǵy jalaqynyń joǵary ósý qarqyny óte mańyzdy. Óıtkeni ol óndiristi damytý, eńbek ónimdiliginiń ósýi jáne sapaly jumys oryndaryn qurý arqyly halyqtyń tabysyn arttyrý múmkindikteriniń birtindep keńeıýin kórsetedi.

— Ulttyq ekonomıka mınıstrligi halyqtyń naqty tabysynyń odan ári turaqty ósýi Úkimettiń ekonomıkalyq saıasatynyń negizgi mindetteriniń biri bolyp qala beretinin atap ótti. Ol úshin eń tómengi jalaqyny kezeń-kezeńimen arttyrý, sapaly jumys oryndaryn qurý, eńbek ónimdiligin arttyrý, kásipkerlikti qoldaý jáne qosylǵan quny joǵary salalardy damytý sekildi, eńbekaqyny ulǵaıtý jónindegi sharalar keshenin kózdeıtin halyqtyń tabysyn arttyrýdyń keshendi jospary iske asyrylyp jatyr, — delingen habarlamada.

Inflıatsııalyq qysymnyń odan ári tómendeýimen ushtastyra otyryp, osy sharalardy iske asyrý naqty tabystyń neǵurlym ornyqty ósýin jáne azamattardyń ál-aýqatyn arttyrýdy qamtamasyz etýi tıis. Úkimettiń, Ulttyq banktiń jáne QNRDA-nyń 2026-2028 jyldarǵa arnalǵan birlesken is-qımyl baǵdarlamasyna sáıkes halyqtyń naqty tabysynyń nysanaly ósýi jyl saıyn 2-3%-dan tómen emes.

Buǵan deıin Premer-mınıstr Oljas Bektenov 2026 jyly ınflıatsııa deńgeıin 10 paıyzdan tómen ustaýdy tapsyrǵanyn jazǵanbyz.