Qazaqstanda halyqtyń 59,6 paıyzy sport ınfraqurylymymen qamtylǵan – mınıstr

ASTANA. KAZINFORM – Qazaqstanda sport ınfraqurylymyn damytý jumystary jalǵasyp jatyr. 2029 jylǵa qaraı halyqtyń sport nysandarymen qamtylý deńgeıin qazirgi 59,6 paıyzdan 65 paıyzǵa jetkizý josparlanǵan. Bul týraly QR Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda málimdedi.

v
Foto: BQO ákimdigi

Mınıstrdiń aıtýynsha, 2027 jyly Memleket basshysy jarııalaǵan Halyqtyq aýqymdy qurylys jyly aıasynda óńirlerde áleýmettik mańyzy bar nysandar salý jáne jańartý jumystary júrgiziledi. Onyń ishinde sport ınfraqurylymyna da basymdyq beriledi.

Alaıda jańa nysandardyń qurylysyn bastamas buryn ár óńirdiń naqty qajettiligin anyqtaý mańyzdy.

– Qazirgi ýaqytta elimizde 26 myńnan astam sport nysany jumys isteıdi. Búginde halyqtyń sport ınfraqurylymymen qamtylý deńgeıi 59,6 paıyzdy quraıdy. Tujyrymdamaǵa sáıkes, 2029 jylǵa qaraı bul kórsetkishti 65 paıyzǵa jetkizý josparlanǵan, – dedi Erbol Myrzabosynov.

Mınıstrdiń málimetinshe, 2026 jyly elimizde 121 sport nysanyn paıdalanýǵa berý kózdelgen. Qazirgi ýaqytqa deıin onyń 69-y iske qosylǵan. Sonyń 51-i aýyldyq jerlerde ornalasqan.

Jyl sońyna deıin taǵy 52 sport nysanyn paıdalanýǵa berý josparlanyp otyr.

Sonymen qatar qoldanystaǵy sport nysandaryn jańǵyrtý jáne jańa nysandar salý jumystary da jalǵasady.

Osylaısha, aldaǵy kezeńde sport ınfraqurylymyn damytýda óńirlerdiń suranysyn eskerý, ásirese aýyldyq eldi mekenderdi sport nysandarymen qamtamasyz etý negizgi baǵyttardyń biri bolmaq.

Buǵan deıin Memleket basshysy sport salasy árdaıym memlekettiń basty nazarynda bolatynyn aıtqan edi.