Qazaqstanda halyqtyń 44,5%-y sportpen turaqty aınalysady

Úkimet málimetinshe, balalar men jasóspirimderdiń 34,6%-y turaqty túrde sportpen shuǵyldanady. Qazirgi tańda 4 pen 17 jas aralyǵyndaǵy 228 myńnan astam bala 7 myńnan astam sport sektsııasyna tegin qatysady. Bul maqsatqa jan basyna shaqqandaǵy qarjylandyrý tetigi arqyly 50 mlrd teńge bólingen.

Sonymen qatar elimizdegi 526 balalar men jasóspirimder sport mektebinde 400 myń jas sportshy jattyǵady.

– Memleket basshysynyń tapsyrmasy boıynsha jattyqtyrýshylyq qyzmet, sporttyq medıtsına, sporttyq analıtıka jáne sport menedjmenti baǵyttary boıynsha mamandar daıarlaıtyn Qazaq ulttyq sport ýnıversıteti jumysyn bastady. Búginde elde 26,5 myń sport nysany jumys isteıdi. Bıyldyń ózinde 34 jańa nysan paıdalanýǵa berildi, onyń 21-i aýyldyq jerde ornalasqan. Jyl sońyna deıin taǵy 87 sport nysanynyń qurylysy aıaqtalady, – delingen Úkimet habarlamasynda.

Úkimettiń málimetinshe, buqaralyq sporttyń damýy halyqaralyq arenalardaǵy joǵary nátıjelerge de yqpal etip otyr.

– XXV Qysqy Olımpıada oıyndarynda Qazaqstan mánerlep syrǵanaýdan tarıhtaǵy alǵashqy altyn medalin jeńip alyp, jalpykomandalyq esepte 19-orynǵa turaqtady. XIV Qysqy Paralımpıada oıyndarynda qazaqstandyq sportshy bıatlon men shańǵy jarysynan altyn jáne qola medal ıelendi. Sondaı-aq qazaqstandyq tennısshi Australian Open týrnıriniń áıelder arasyndaǵy jekeleı synynda chempıon atandy, stend atýdan Álem kýbogynda álemdik rekord qaıtalanyp, qazaqstandyq shahmatshy Norway Chess Women 2026 sýpertýrnıriniń jeńimpazy boldy, – dep atap ótti Úkimet.

Jyl basynan beri qazaqstandyq sportshylar 11 álem chempıonaty men 26 Azııa chempıonatynda jalpy 152 medal jeńip alǵan. Onyń ishinde 99 altyn, 33 kúmis jáne 20 qola medal bar.

Sonymen qatar Qazaqstanda semserlesý, stend atý jáne bochcha sport túrlerinen Álem kýboktary, IBSA JUDO GRAND PRIX ASTANA halyqaralyq týrnıri jáne dzıýdodan Grand Slam kezeńderi joǵary deńgeıde uıymdastyryldy.

Aıta keteıik, aýyl halqynyń 62,1%-y sport ınfraqurylymymen qamtylǵan.