Qazaqstanda halyqty tumaýǵa qarsy tegin vaktsınalaý 40 paıyzǵa jetkizilmek
ASTANA. KAZINFORM – 2027 jyly Qazaqstanda tumaýǵa qarsy otandyq vaktsınany jappaı óndirý josparlanyp otyr. Bul týraly Densaýlyq saqtaý mınıstri Aqmaral Álnazarova málim etti.
- Tumaýǵa qarsy vaktsınany Reseıden jetkizemiz. Tumaýdyń taralýyna qatysty tıisti taldaý jasap, qaı vırýsqa tıimdi áser etetin ekpeni aldyramyz. Byltyr jáne bıyl jetkizilgen vaktsınanyń tıimdiligi 90 paıyzdan joǵary, - dedi A. Álnazarova Kazinform tilshisine bergen suhbatynda.
Sonymen qatar ol tumaýǵa qarsy ekpeni Qazaqstan aýmaǵynda jasaý jospary júzege asyp jatqanyn aıtty.
- Búginde sertıfıkattaý boıynsha jumystar júrip jatyr. 2027 jyly tumaýǵa qarsy otandyq vaktsınany shyǵaryp, ózimizde óndiretin bolsaq, halyqtyń 30-40 paıyzyna deıin tegin ekpemen qamtamasyz etýge múmkindik bolady. Sondyqtan mınıstrlik aldynda osyndaı mindet tur, - dedi vedomstvo basshysy.
Aıta keteıik, qazir el halqynyń 10-11 paıyzy jyl saıyn tumaýǵa qarsy vaktsınalaýmen qamtylyp keledi.