Bas prokýratýra ınvestıtsııalardy qorǵaýda «100% kepildik» júıesin engizdi
ASTANA. KAZINFORM — Bas prokýror Berik Asylov Qazaqstandaǵy Investıtsııalardy qorǵaý jáne qoldaý máseleleri jónindegi forýmnyń ashylýynda ár ınvestorǵa jeke prokýror bekitiletinin málimdep, elde ınvestorlardyń quqyqtaryn qorǵaý – eń basty memlekettik basymdyq ekenin atap ótti. Ol «prokýrorlyq súzgi» tetigi arqyly zańsyz tekserister men kedergilerge jol berilmeıtinin jetkizdi.
— Bul is-shara Qazaqstanda ınvestıtsııalardy qorǵaý — eń mańyzdy memlekettik basymdyqtardyń biri ekenin aıqyn dáleldeıdi. Memleket basshysy Qasym-Jomart Kemeluly naqty ustanymdy aıqyndady: ınvestor naqty qorǵaýdy sezinip, ashyqtyq pen turaqtylyqqa senimdi bolýy tıis. Dál osy qaǵıdattar elimizdiń zamanaýı ınvestıtsııalyq saıasatynyń negizin quraıdy. Qazaqstan 48 úkimetaralyq ınvestıtsııalardy kótermeleý jáne ózara qorǵaý týraly kelisimge qol qoıyp, elimizde qolaıly ınvestıtsııalyq ahýal úshin senimdi quqyqtyq negiz qalyptastyrdy, — dedi Bas prokýror.
Onyń aıtýynsha, Konstıtýtsııaǵa sáıkes prokýrorlarǵa zańdylyqtyń saqtalýyna joǵary qadaǵalaý fýnktsııasy júktelgen, onyń aıasynda prokýratýra azamattar men bıznestiń quqyqtaryn da qorǵaıdy.
– Búginde biz eki myń ınvestorǵa kómek kórsetip, 30 myń jumys ornyn qamtıtyn 250-den astam jobanyń iske qosylýyn qamtamasyz ettik. Qazaqstan prokýratýrasy tikeleı Memleket basshysyna baǵynady, basqa memlekettik organdardan táýelsiz jáne kez kelgen quqyq buzýshylyqtarǵa jedel áreket etýge qabiletti. Investorlardy qorǵaý tetigin odan ári kúsheıtý maqsatynda Memleket basshysynyń Jarlyǵymen Investıtsııalyq ombýdsmenniń fýnktsııalary Bas Prokýrorǵa júkteldi (2025 jylǵy jeltoqsan), – dedi Berik Asylov.
Onyń sózinshe, Bas prokýratýra bazasynda Investorlardyń quqyqtaryn qorǵaý komıteti qurylǵan.
— Óńirlerde men oblys prokýrorlarynyń orynbasarlary deńgeıinde ınvestıtsııalyq prokýrorlardy taǵaıyndadym. Qazaqstandaǵy árbir mańyzdy ınvestıtsııalyq joba prokýrorlyq súıemeldeýde bolady. Árbir ınvestorǵa naqty prokýror bekitiledi. Qazirgi ýaqytta Zańda barlyq memlekettik organdar úshin «prokýrorlyq súzgi» dep atalatyn tetik kózdelgen. Olar prokýrordyń kelisiminsiz ınvestordy tekserýge, onyń qyzmetin toqtatýǵa, lıtsenzııasyn keri qaıtaryp alýǵa jáne ózge de shekteýler engizýge quqyly emes. Bul — bizdiń qadaǵalaý fýnktsııamyzdyń júzege asyrylýy. Eger memlekettik organnyń sheshimi nemese áreketi zańsyz bolsa — biz ony joıamyz, al kináli laýazymdy tulǵalar jaýapkershilikke tartylady. Eger zańnamada kedergiler bolsa — olar da joıylatyn bolady, — dedi Bas prokýror.
Berik Asylov Komıtetke memlekettik organdardyń zańǵa táýeldi aktilerin aıqyn nemese jasyryn kedergilerdiń bar-joǵyna qatysty revızııa júrgizýdi tapsyrǵanyn aıtty.
— Olar Konstıtýtsııada azamattar men bıznes úshin belgilengen kepildikterdi tómendetpeýi tıis. Bas prokýratýra Memleket basshysy aıqyndaǵan «Zań jáne tártip» tujyrymdamasyna tolyq sáıkes ınvestorlardyń quqyqtarynyń saqtalýyn qamtamasyz etedi, — dedi ol.
Sonymen qatar, Bas Prokýror Úkimet janyndaǵy Investıtsııalyq shtabtyń bıznestiń máselelerin jedel sheshýdegi negizgi rólin atap ótti.
Shtab naqty qorǵaý quralyna aınaldy:
— 2 jyl ishinde 200-den astam ınvestıtsııalyq joba qaraldy.
— Jobalardyń jalpy somasy — 100 mlrd AQSh dollarynan astam.
— Investıtsııalyq kelisimderdiń kólemi 15 esege ósti.
«Bul — ınvestorlardyń seniminiń kórsetkishi jáne tıimdi úılestirýdiń nátıjesi», — dep atap ótti vedomstvo basshysy.
Buǵan deıin Berik Asylov ınvestorlardyń quqyǵyn qorǵaý komıteti ekonomıkalyq ósimniń júıeli quralyna aınalǵanyn aıtqan edi.
