Qazaqstanda halyqaralyq oqý standarttaryn jáne táýelsiz sertıfıkattaý júıesin engizý máselesi qaralyp jatyr
ASTANA. KAZINFORM - QR Premer-mınıstriniń orynbasary Tamara Dúısenova Pearson kompanııasynyń óńirlik dırektory Arkadıýsh Javorskıımen kezdesti. Qazaqstandyq mamandardy oqytý jáne sertıfıkattaý máseleleri talqylandy, dep habarlaıdy Úkimettiń baspasóz qyzmeti.
Pearson – álemdegi jetekshi bilim berý kompanııalarynyń biri jáne Ulybrıtanııadaǵy eń iri biliktilikti sertıfıkattaý uıymy. Bilim berý baǵdarlamalary men baǵalaý salasyndaǵy halyqaralyq sarapshylarmen yntymaqtastyqtyń arqasynda Pearson álemdik deńgeıdegi biliktilik standarttaryn ázirleıdi. Kompanııanyń tizimine kiretin BTEC sertıfıkaty 70-ten astam elde tanylǵan.
Vıtse-premer jumys berýshilerdiń tehnıkalyq tapsyrmalaryn (kásiptik standarttar), olarǵa sáıkes keletin bilim berý baǵdarlamalaryn jáne osy baǵdarlamalar boıynsha bilim alýshylardyń bilim deńgeıin, iskerlikteri men daǵdylaryn baǵalaýdy (sertıfıkattaý) qamtıtyn Ulttyq biliktiliktiń otandyq júıesin damytý týraly aıtyp berdi.
Memleket basshysynyń tapsyrmasy boıynsha joǵary bilim berýdi ınternatsıonaldandyrý bastaldy. Elde 23 tanymal sheteldik ýnıversıtetter jumys isteı bastady. Orta jáne kásiptik bilim berýdi transformatsııalaý boıynsha sharalar qabyldanýda. TjKB naryq úshin kadrlar daıarlaý bazasyna aınalýy tıis.
«Búginde bizde qurylys, energetıka, munaı-gaz sektory salalaryna maman daıarlaıtyn birneshe kolledj halyqaralyq standarttardy qoldanýda. Bul úrdisti jalǵastyrý biz úshin mańyzdy. Sondyqtan dál osy baǵytta biz tıimdi yntymaqtasa alamyz dep sanaımyn», — dep atap ótti Tamara Dúısenova.
Pearson kompanııasynyń ókili Qazaqstanda halyqaralyq oqý standarttaryn jáne táýelsiz sertıfıkattaý júıesin engizý úshin salalyq mınıstrliktermen áriptestik ornatýǵa daıyn ekendigin bildirdi.
«Standarttardy ázirleý kezinde biz jumys berýshilerdiń suranysyna nazar aýdaramyz. Biz biliktilik standarttaryn qurý, oqý baǵdarlamalaryn baǵalaý jáne qajet bolǵan jaǵdaıda olardy jetildirý boıynsha birlesip jumys isteýge daıynbyz»,— dedi Arkadıýsh Javorskıı.
