Qazaqstanda hakerlik shabýylǵa qaýqarsyz 170 iri saıt anyqtaldy
Elimizde bul qylmys túri jyl saıyn artyp keledi. Máselen, 2012 jyly 800 kıbershabýyl tirkelse, byltyr 25 myńǵa jetken. Buryn hakerlerdiń maqsaty aqsha jymqyrý bolsa, qazir olardyń deni azamattardyń jeke derekteri men memlekettik organdardyń málimetterin urlaýdy kózdeıdi eken. Máselen ótken jyly 150 memlekettiń 100 myńnan astam kásiporny Wanna Cry atty vırýstyń quryǵyna túsken. Bul vırtýaldy indet elimizdiń 4 memlekettik mekemesin de ábigerge salǵan bolatyn.
Atap ótilgendeı, qazaqstandyq 170 iri saıt hakerler aldynda qaýharsyz. Ulttyq qaýipsizdik komıtetiniń mamandary ınternet-resýrstarda 2500-den astam osal tustardy anyqtaǵan. Biraq olardyń naqty qandaı ekendigi naqtylanbaýda. Kóp jaǵdaıda saýda-sattyqpen aınalysatyn saıttar buzylyp, olar jalǵan paraqshalarmen almastyrylady.
UQK mamandary ınternette jeke málimetterdi jóni-joq ornalastyrmaýǵa jáne kúmándi spam-habarlamalardy ashpaýǵa keńes beredi.
Aıta keteıik, qazir Qazaqstanda kıberqylmystarǵa tótep berý úshin «Kıberqalqan» baǵdarlamasy júzege asyrylýda.
«Poshta arqyly spam-habarlamalar kelip jatady. Olardy ashý arqyly nemese tanys emes ınternet-resýrstarǵa kirý arqyly kompıýterińizge kóp vırýstar kirýi múmkin. Ol vırýstar kompıýterińizde bir kún emes, bir aı emes, jyldap qalýy múmkin», - deıdi QR UQK «Memlekettik tehnıkalyq qyzmet» RMK dırektory Erjan Birjanov.
