Qazaqstanda Haggı Vaggı oıynshyqtary satylymnan alynyp tastalýy múmkin

ASTANA. QazAqparat - Qorqynyshty, gıbrıdti belgileri bar oıynshyqtardyń balalar psıhıkasyna áseri Eýrazııa ekonomıkalyq odaǵynyń keńesinde qaraldy, dep habarlaıdy QazAqparat Úkimettiń resmı saıtyna silteme jasap.

2022 jyldyń jeltoqsanynda Roskachestvo Haggı Vaggı tanymal oıynshyqtaryna zertteý júrgizip, kóptegen kemshilikter tapty. Onyń ishinde ónimniń qaýipsizdigine baılanysty aqaýlar da bar.

Osydan keıin reseılik onlaın-dúkender Haggı Vaggıdi satylymnan ala bastady.

Keıbir psıhologtardyń pikirinshe, mundaı qorqynyshty oıynshyqtar zorlyq-zombylyq pen agressııaǵa toly oıyn sıýjetterin týdyrady.

25 qańtarda Máskeýde Eýrazııalyq odaqqa qatysýshy elder balalardyń psıhıkalyq damýyna jaǵymsyz áser etýi yqtımal oıynshyqtarǵa qoıylatyn talaptardy ázirleýge kelisti.

«Psıhologııalyq-pedagogıkalyq qaýipsizdik» talaptaryn engizý usynysy qazirgi naryqta qorqynyshty, kúsh kórsetý belgileri bar, gıbrıdti jáne t. b. oıynshyqtardyń jıi kezdesýimen baılanysty jasalyp otyr. Keıbir psıhologtardyń pikirinshe, mundaı «qorqynyshty» oıynshyqtar zorlyq-zombylyq pen agressııamen baılanysty oıyn sıýjetin týdyrady.

Oıynshyqtarǵa arnalǵan qoldanystaǵy tehnıkalyq reglamentte tek materıaldarǵa, toksıkologııalyq-gıgıenalyq jáne mıkrobıologııalyq kórsetkishterge, fızıkalyq jáne mehanıkalyq, hımııalyq jáne elektrlik qasıetterge, radıatsııalyq qaýipsizdikke qoıylatyn talaptar ǵana belgilengen.

Osylaısha, naryqtan «qorqynyshty» oıynshyqtardy alyp tastaý múmkin emes.

Otyrysta aıtylǵan qazaqstandyq taraptyń pikirinshe, bul máseleni qarastyrý úshin oıynshyqtyń balaǵa keri áserin anyqtaıtyn ólshemderdi belgileıtin standarttar qajet.

«Balalardyń fızıkalyq jáne psıhıkalyq densaýlyǵyn qalyptastyrýdyń mańyzdylyǵy kúmán týdyrmaıdy. Qazaqstan 2015 jyly oıynshyqtarǵa psıhologııalyq-pedagogıkalyq saraptama júrgizý úshin tehnıkalyq reglamentke ózgerister engizýge bastamashy boldy. Ol kezde mundaı oıynshyqtardyń balanyń psıhıkasyna jaǵymsyz áser etý krıterıılerin aıqyndaý standartynyń bolmaýyna, ǵylymı zertteýler júrgizý qajettiligine baılanysty qujat qoldaý tappady», — dedi EEK keńesinde QR Densaýlyq saqtaý vıtse-mınıstri Aıjan Esmaǵambetova.

Onyń aıtýynsha, búginde naryq túrli oıynshyqtar bar.

Sondyqtan oıynshyqtardyń balanyń psıhıkasyna keri áser etý krıterıılerin aıqyndaý standartyn ázirleý jáne Eýrazııalyq Odaq elderi deńgeıinde tıisti tártipte pysyqtaý úshin qoldanystaǵy tehnıkalyq reglamentterdi ózgertý jóninde usynystar engizý usynylyp otyr.