Qazaqstanda ǵylymı jobalarǵa grant qalaı beriledi
«Bizde grant berý sharttary tolyǵymen zańdy negizde iske asyrylady. Grant berý tártibi aıtarlyqtaı qarapaıym. Konkýrsqa qatysýshylar men ǵalymdarymyzdyń bári bul sózimizdi rastaı alady. Shart boıynsha joba jetekshisi mindetti túrde Qazaqstan azamaty bolýy kerek. Sol sekildi joba da Qazaqstan aýmaǵynda júzege asyrylýy tıis. Granttyń somasy - 300 mıllıon somadan aspaıdy. Ǵylymı jobany usynatyn komanda jeti adamnan aspaýy tıis. Ol komandada kommertsıalızatsııa boıynsha mamannyń bolýy mindetti. Álbette, joba úsh jylǵa deıin iske asýy tıis», - deıdi Ánýarbek Sultanǵazın.
Onyń aıtýynsha, «Ǵylym qory» AQ belgili bir ǵalymnyń jobasyna qarajat bólý jaǵymen birge, ol jobanyń naryqta óz ornyn tabýyna da kómektesedi.
«Bizdiń árbir jobanyń ózindik kúntizbelik jospary men smetasy bar. Kúntizbelik jospar boıynsha, 2018 jyldyń 31 jeltoqsanyna deıin 6 jobany aıaqtap bitirýimiz kerek bolatyn. Biz bul jobalardy tolyq aıaqtadyq. Kúntizbelik jospar boıynsha osy jyly 31 jobany bastaımyz», - dedi ol.
Eske sala ketsek, «Ǵylym qory» AQ Basqarma tóraǵasy Ánýarbek Sultanǵazınniń úsh konkýrstyń nátıjesi boıynsha maquldanǵan jobalarǵa otandyq bıznes ókilderi burynǵydan kóbirek aqsha bóle bastaǵanyn habarlaǵan edik.
«Alǵashqy konkýrsqa bar-joǵy 337 joba kelip tústi de, sonyń nátıjesi boıynsha 32 joba qarjylandyrý boıynsha qoldaý tapty. Al 2017 jyly ótkizgen konkýrsqa 502 joba tústi. Olardyń ishinde 72 joba qoldaýǵa ıe boldy. Sonymen qatar, úshinshi konkýrsqa 431 joba qabyldanyp, onyń 78-i irikteldi. Osylaısha, iske asyrylǵan jobalardy eseptep otyrsaq, úsh konkýrs boıynsha maquldanǵan jobalarǵa bólinetin qarajattyń 40,3 paıyzyn bıznes ókilderi aýdarǵan. Demek, bıznes qazirgi tańda Qazaqstanda ǵylymmen jumys isteýge bolatynyna sendi», - deıdi Ánýarbek Sultanǵazın.