Qazaqstanda ǵylymı qyzmet nátıjelerin kommertsııalandyratyn zań qabyldandy
ASTANA. QazAqparat - Búgin Parlament Senatynyń jalpy otyrysynda «Ǵylymı jáne (nemese) ǵylymı-tehnıkalyq qyzmet nátıjelerin kommertsııalandyrý týraly» QR Zańy qabyldandy.
Qujattyń maqsaty otandyq ǵylym salasynyń nátıjeliligin, ınnovatsııalardy engizýdiń deńgeıin arttyrý jáne ekonomıka damýynyń basym baǵyttarynda joǵary tehnologııalyq óndiristi damytý bolyp tabylady. Bul rette zań arqyly ǵylymı jáne ǵylymı-tehnıkalyq qyzmet nátıjelerin kommertsııalandyrýdy yntalandyrýdyń memlekettik sharalary qamtylyp otyr. Atap aıtqanda, bıznestiń qosalqy qarjylandyrýyn qosa alǵanda, bıýdjet qarajatynan kommertsııalandyrý jobalarynyń granttyq qarjylandyrylýy kózdeledi. Budan bólek, joǵary oqý oryndarynyń, ǵylymı-zertteý ınstıtýttarynyń, kommertsııalandyrý ortalyqtarynyń, ǵylymı qyzmet nátıjeleriniń avtorlaryn qoldaý sharalary qaralady. Sonymen qatar óndiriske ınnovatsııalardy engizý boıynsha jumystardy qarjylandyrý tetikteri qamtylady. Ǵylymı granttar men baǵdarlamalardyń qurylymyn ındýstrııalyq-ınnovatsııalyq damý baǵdarlamasynyń qajettilikterine qaıta baǵdarlaý qarastyrylady. «Zań jobasy arqasynda bızneske otandyq tehnologııalar men zerttemelerdi yntalandyrý sharalary qamtylyp otyr. Joǵary oqý oryndary men ǵylymı-zertteý ınstıtýttarynyń ınnovatsııalyq ınfraqurylymynyń asa mańyzdy býyn retindegi rólin kúsheıtýge basa nazar aýdarylyp otyr», - deıdi Bilim jáne ǵylym mınıstri Aslan Sárinjipov. Parlament qabyldaǵan zań Memleket basshysynyń qol qoıýyna joldanady.
